अर्थमन्त्री अमेरिका प्रस्थान, एकाएक किन गए ?

काठमाडौं, असोज २८ । विश्व बैंकको बैठकमा भाग लिन अर्थमन्त्री युवराज खतिवडा अमेरिका प्रस्थान गरेका छन् । प्रतिनिधिमण्डलमा अर्थ मन्त्रालय, अन्तर्रा्ष्ट्रिय आर्थिक सहायता समन्वय महाशाखाका सहसचिव श्रीकृष्ण नेपाल समेत सहभागी छन् ।

अर्थमन्त्री डा. युवराज खतिवडा विश्व बैंक समूह र अन्तर्रा्ष्ट्रिय मुद्रा कोषको संयुक्त वार्षिक बैठकमा भाग लिन मंगलबार अमेरिका प्रस्थान गरेका हुन् । विश्व बैंक र अन्तर्रा्ष्ट्रिय मुद्रा कोष अन्तर्गत दक्षिणपूर्व एशियाली मतदान समूहको नेपाल सदस्य हो ।

दक्षिण एशियाली क्षेत्रीय सहयोग संगठन (सार्क) को अध्यक्षता हाल नेपालले गरिरहेको परिप्रेक्षमा सार्कका अर्थमन्त्रीहरु सम्मिलित अनौपचारिक बैठकको अध्यक्षतासमेत अर्थमन्त्री डा. खतिवडाले गर्ने कार्यक्रम तय भएको छ ।

सो समूहद्वारा आयोजना हुने संयुक्त बैठकमा अर्थमन्त्री डा. खतिवडा सहभागी हुने कार्यक्रम छ । उनले विश्व बैंक मुद्रा कोषका वरिष्ठ अधिकारीहरुसँग द्विपक्षीय छलफल गर्ने छन् ।
खतिवडाले अन्तर्रा्ष्ट्रिय विकास संस्थाबाट नेपालको नीतिगत सुधारको लागि प्राप्त हुँदै आएको सहायतालाई थप प्रभावकारी बनाउने उपायलगायत सहायताका थप क्षेत्र र सम्भावना बारे विस्तृत छलफल गर्ने कार्यक्रम छ ।

संघीयता कार्यान्वयनको क्रममा नेपालले हासिल गरेका अनुभवको आदान प्रदान गर्ने कार्यक्रममा अर्थमन्त्री डा. खतिवडा सहभागी हुनेछन् । विश्व बैंकको अन्तर्रा्ष्ट्रिय विकास संस्थासँग नेपालको सहकार्य ५० वर्ष पुगेको अवसरमा आयोजना हुने कार्यक्रममा समेत उनले भाग लिने छन् ।

नेपाललाई सहयोग गरिरहेका अन्य दातृ मुलुक तथा संस्थाका उच्च पदाधिकारीहरुसँग पनि उनले द्विपक्षीय भेटवार्ता गर्ने भएका छन् । अर्थमन्त्री डा. खतिवडा ६ कात्तिकमा स्वदेश फर्कने कार्यक्रम छ ।