प्रधानमन्त्री ओलीले भने- म आफै हलो जोतेर आएको हुँ, मलाई जमिन, सिँचाइ र उत्पादनबारे राम्रोसँग थाहा छ

काठमाण्डौ , असोज ८ । प्रधानमन्त्री केपी शर्मा ओलीले सिँचाइ र प्रविधिको उचित प्रबन्ध गर्न सके सानो ठाउँमा पनि धेरै उत्पादन गरेर लाभ गर्न सकिने बताएका छन् ।

‘म आफै हलो जोतेर, खेती गरेर आएको हुँ । मलाई जमिन, सिँचाइ र उत्पादनबारे राम्रोसँग थाहा छ’, प्रधानमन्त्री ओलीले आफ्नो युवा उमेर सम्झँदै किसान नेताहरु सुनाए ।

मेहनत गरेमा ठूला घोगा मकै र झपक्क धानको बाला झुलाउन सकिने उनले उल्लेख गरे ।

उनले सत्तारुढ नेपाल कम्युनिष्ट पार्टी (नेकपा) निकट अखिल नेपाल किसान महासङ्घको प्रथम केन्द्रीय कमिटीको बैठक र शपथ ग्रहण समारोहलाई बुधबार ललितपुरको धोबीघाटमा सम्बोधन गर्दै कृषिमा आधुनिकीरण र व्यावसायीकरणका लागि सरकारले चलाएका पहलबारे जानकारी दिए ।

नेपालको कुल क्षेत्रफलको २८ प्रतिशत भूमि (झण्डै ४१ लाख २१ हजार हेक्टर) कृषि भूमि रहेकामा सिँचाइको असुविधाका कारण हाल २६ लाख ४१ हजार हेक्टरमामा मात्र खेती गरिएको छ ।

‘हामीले प्रधानमन्त्री कृषि आधुनिकरणलगायत कार्यक्रममार्फत यस क्षेत्रलाई अगाडि बढाउन खोजेका छौँ । हाम्रो संयन्त्र र विज्ञलाई जमिनको एक टुक्रो पनि खाली नहुने गरी नयाँ प्रविधिका साथ जमिनलाई चक्लाबन्दी वा सामूहिक खेतीतर्फ लान खोजेका छौँ’, उहाँले भन्नुभयो, ‘सहकारी वा किसान सहकार्यमार्फत एक क्षेत्रमा एक मात्रै धेरै उत्पादन गरी बजारीकरणसहित लाभ लिने र निर्यात गर्ने स्थितिमा पुग्नुपर्छ । कृषि क्षेत्रलाई सरकारले दिने अनुदान र राहतमा निरन्तरता हुनेछ ।’

फरक प्रसंगमा प्रधानमन्त्री ओलीले लामो समयको बलिदान र सङ्घर्षपछि सङ्घीय लोकतान्त्रिक गणतन्त्रसहितको संविधान जारीसँगै स्थिर सरकार सुशासन र विकासको बाटोमा लागेको र नेकपाको एकता प्रक्रियामा पूर्णतामा केही ढिलाइ भए पनि अब टुङ्गिएकाले पार्टीले गति लिने विश्वास व्यक्त गरे ।