जाँच गर्न ट्रकमा चढेका प्रहरीलाई नै लिएर चालक फरार, गोली हानेर गाँजासहित पक्राउ

काठमाडौं, असोज ७ । जाँच गर्नका लागि ट्रकमा चढेका प्रहरी जवानलाई नै लिएर फरार भएका चालकलाई प्रहरीले गोली हानेर पक्राउ गरेको छ।

चालक चौधरीको भने खुट्टामा गोली लागेको छ। उनको हेटौडा अस्पतालमा उपचार भइरहेको छ। प्रहरीले ट्रकबाट ७८ किलो ८ सय ग्राम गाँजा बरामद गरेको छ।

घटना मकवानपुरको हो। हेटौडा उपमहानगरपालिका–१५ स्थित सडकमा गएराति साढे १ बजे प्रहरीले चेकिङ गरेको थियो। जिल्ला प्रहरी कार्यालय मकवानपुर र इलाका प्रहरी कार्यालय पशुपतिनगरको टोलीले संयुक्त जााच गरेका थिए।

सो क्रममा हटौडाबाट पथलैयातर्फ जाँदै गरेको ना ६ ख १३१ नम्बरको ट्रक जाँच गर्न प्रहरी जवान सञ्जिवकुमार दास ट्रकमा चढेका थिए। ट्रकको क्याबिनको भाग प्रहरी जवान दासले जाँच गर्दै अपहरण शैलीमा ट्रक कुदाएर चालक वीरगञ्ज महानगरपालिका–२९ का ३५ वर्षीय अफ्रिका चौधरीले भगाएका थिए।

अपहरण शैलीमा ट्रकलाई भगाएपछि प्रहरी उक्त ट्रक पच्छ्याउँदै गएको थियो। सो क्रममा साढे ३ किलोमिटर दक्षिण नयाँ बस्ती जाने सडकमा पुगेपछि ट्रकलाई फेला पारेको प्रहरी टोलीले चालकलाई गोली हानेर नियन्त्रणमा लिएको छ।

ट्रक कुदाएको बेला ट्रकमै रहेका अर्का एक व्यक्ति भने प्रहरीलाई लछारपछार पार्दै जंगलतर्फ फरार भएको प्रहरीले जनाएको छ।