मन्त्री बाँस्कोटा भन्छन्- भ्रष्टाचार बढेको होइन, अख्तियार सक्रिय भएको हो
काभ्रेपलाञ्चोक, साउन ३२ । सञ्चार तथा सूचना प्रविधिमन्त्री गोकुलप्रसाद बाँस्कोटाले नेपालमा वर्तमान अवस्थामा भ्रष्टाचार बढेको नभइ अख्तियार दुरुपयोग अनुसन्धान आयोग सक्रिय भएको बताएका छन् ।
नेपाल निर्माण व्यवसायी संगठन प्रदेश नम्बर–३ को घोषणासभालाई शनिबार बनेपामा सम्बोधन गर्दै उनले अख्तियारलाई सक्रिय बनाइएका कारण भ्रष्टाचारीलाई कानुनी दायरामा ल्याउने काम भइरहेको बताए ।
‘एकपछि अर्को भ्रष्टाचारी समातिएका छन्, यसबाट भ्रष्टाचार बढेको ठान्नु गलत हो । यो अख्तियारलाई सक्रिय बनाइएको प्रतिफल हो’–उनले भने ।
उनले यसअघिका सरकारका समयमा पनि अख्तियार भएपनि यत्तिको सक्रिय नभएको दाबी गरे ।
मन्त्री बाँस्कोटाले विभिन्न निकायका कर्मचारीलाई काम छिटो र नाफामूलक बनाउने प्रवृत्तिका कारण भ्रष्टाचार हुने गरेको बताए ।
उनले भने–‘फाइल बुझाउन जाँदा कर्मचारीलाई ‘बेलुका तपाइँको फुर्सद के छ रु भेटौं न’ भन्ने प्रवृत्तिले भ्रष्टाचारले प्रसय पाउने हो । यस्तो प्रवृत्ति छ भने आजै त्याग्नोस्, नत्र तपाइँ पनि फन्दामा पर्नुहोला ।’
उनले कसैले अनुचित रकम दिए वा लिएको जानकारी भएलगत्तै सरोकारवाला निकायलाई खबर गर्न आग्रह गरे ।
उनले रु एक अर्बसम्मको काम नेपाली निर्माण व्यवसायीले नै गर्नसक्ने भएकाले आफ्नो क्षमता अभिवृद्धि गरी काम गर्न सुझाव दिए ।
‘आफू क्षमता वृद्धि गरेर आउनोस्, कुनै अप्ठ्यारो छैन’–उनले भने–‘बोलपत्र आफूलाई नपर्दा अदालत जाने काम पनि राम्रो होइन ।’
समुद्ध नेपाल बनाउने प्रमुख औजारमध्येको निर्माण क्षेत्र पनि एक भएको उनको धारणा थियो ।
मन्त्री बाँस्कोटाले मन्त्रालयमार्फत् चारओटा प्रदेशमा अप्टिकल फाइबर बिछ्याउँदा आफूले पनि निर्माण व्यवसायीबाट केही अप्ठ्यारो व्यहोर्नुपरेको बताउँदै नाफामूलक सामाजिक सेवामा सरकारलाई नै सघाउनुपर्ने उल्लेख गरे ।
उनले भने–‘समयमै काम नसक्दा पनि ठकेदार अदालत धाउँछन् । यसले कसैलाई फाइदा पुग्दैन ।’
निर्माण क्षेत्रको संशोधित पछिल्लो खरिद नियमावली अन्तिम नहुने उल्लेख गर्दै उनले व्यवसायीसँग छलफल गर्न सरकार तयार रहेको बताए ।
प्रतिक्रिया दिनुहोस्