४० हजार भन्दा बढि नक्कली भारतीय रुपैयाँसहित दुईजना पक्राउ

काठमाडौं, साउन ४ । प्रहरीले ४० हजार ९०० नक्कली भारतीय रुपैयाँसहित दुईजना भारतीय नागरिकलाई पक्राउ गरेको छ ।

शनिबार कैलालीको धनगढी उपमहानगरपालिका–१ बाट नक्कली भारुको कारोबार गरिरहेको अवस्थामा प्रहरीले उनीहरुलाई पक्रेको हो ।
पक्राउ पर्नेमा भारत, लखिमपुरका श्रवण सिंह र सुरजित सिंह रहेका छन् ।

उनीहरु सुन खरिद गर्ने उद्देश्यले धनगढी आएको खुलेको जिल्ला प्रहरी कार्यालय कैलालीका निमित्त प्रमुख प्रहरी उपरीक्षक दक्ष बस्नेतले जानकारी दिए ।

उनीहरुले १०० रुपैयाँ अंकित दरका नक्कली भारु बोकेका थिए । ती नक्कली नोट बरामद गरिएको छ ।पक्राउ परेकाहरुमाथि थप अनुसन्धान भइरहेको प्रहरीले जनाएको छ ।