राजश्व छली गरी ल्याएको ५ करोड मूल्य बराबरको विद्युतीय सामग्री प्रहरीद्वारा बरामद

काठमाडौं, असार ३१ । महानगरीय प्रहरी परिसर ललितपुरले ५ करोड मूल्य बराबरको विद्युतीय सामग्री बरामद गरेको छ ।

सानेपाको साचलस्थित सन्तगल्लीमा रहेको एक घरबाट करिब ५ करोड बराबरको विद्युतीय सामग्री बरामद भएको ललितपुर प्रहरीले बताएको छ ।

चीनबाट राजश्व छली गरी सामान ल्याएर भारतीय बजारमा विक्री वितरण गर्ने गरेको सुचनाको आधारमा ललितपुर प्रहरीले सानेपाको जेएसएस मोबाइल कलेक्सन एण्ड सर्भिसेज प्रालिमा छापा मारेको हो ।

प्रहरीले छापा मार्ने क्रममा चीनबाट अवैध तरिकाले मेमेरी कार्ड लगायतका सामग्री ल्याइ नेपालमा ब्राण्डेड नाममा प्रिन्ट गर्ने गरेको समेत भेटिएको ललितपुर प्रहरीले बताएको छ ।

प्रहरीले मेमोरी कार्डमा नक्कली ब्राण्डेड प्रिन्ट गर्ने मेसिनसहित मेमेरी कार्ड र अन्य विद्युतीय उपकरण बरामद गरेको परिसरका प्रमुख एसएसपी रविन्द्र धानुकले बताए । हाल कारखानासहित एक गोदाममा पनि छापा मारिएको छ । अहिले राजश्व अनुसन्धान विभागका कर्मचारी पनि प्रहरीले छापा मारेको स्थानमा पुगेका छन् ।

अहिले कारखाना तथा गोदामको मुचुल्का उठाउने काम भइरहेको छ । मुचुल्का उठाएपछि सामानसहित राजश्व अनुसन्धान विभागको जिम्मा लगाउने परिसरका प्रमुख धानुकले बताए ।

मेमोरी कार्ड लगायतका विद्युतीय उपकरण बनाउने कारखानाका सञ्चालकहरु गोविन्द भन्साल र मोहन भन्साल भने सम्पर्कमा नआएको प्रहरीले जनाएको छ ।