शिक्षकको कुटाइबाट घाइते विद्यार्थीको मृत्यु, प्रधानाध्यापकसहित ४ पक्राउ

काठमाडौं, असार २५ । शिक्षकको कुटाइबाट कञ्चनपुरको भीमदत्त नगरपालिका–१७ स्थित महाकाली बाल विद्यालयका एक विद्यार्थीको मृत्यु भएको छ।

गत असार १३ गते शिक्षकको कुटाइबाट घाइते भएका कक्षा–९ मा अध्ययनरत छात्र माधव कलौनीको उपचारका क्रममा भारतको भोजीपुरा अस्पतालमा मृत्यु भएको जिल्ला प्रहरी कार्यालयका प्रहरी निरीक्षक कृष्णनन्द भट्टले जानकारी दिए।

’यसअघि सो घटनाबारे विद्यार्थीका अभिभावकका तर्फबाट चार शिक्षकविरुद्ध ज्यान मार्ने उद्योगमा जाहेरी आएको थियो,’ प्रहरी निरीक्षक भट्टले भने, ’त्यो बेला अभिभावक र शिक्षकबीच पहिले घाइतेको उपचार गराउने सहमति भएको थियो।’

प्रहरीले सुरक्षा र घटनाबारे अनुसन्धानका लागि भन्दै विद्यालयका प्रधानाध्यापक यशोदा जोशी तथा शिक्षक लक्ष्मण भट्ट, दुर्गादत्त पाठक र हर्क जाग्रीलाई मंगलबार राति नै नियन्त्रणमा लिएको छ। प्रहरीले

मृतक विद्यार्थीका अभिभावकले भने प्रधानाध्यापकसहित चारै शिक्षकले कुटपिट गरी घाइते बनाएको आरोप लगाएका छन्।

’शव भारतबाट आइसकेपछि परीक्षण लगायतका प्रक्रिया अघि बढ्छ,’ भट्टले भने, ’पीडित पक्षको जाहेरीका आधारमा कारबाही अघि बढ्छ।’

कुटपिटबाट विद्यार्थीको छाती, टाउकोमा चोट लाग्नुका साथै दायाँ खुट्टा भाँचिएको थियो।

यता, कञ्चनपुरका विभिन्न विद्यार्थी संगठनले प्रेस विज्ञप्ति जारी गर्दै घटनाको अनुसन्धान गरी दोषीमाथि कारबाहीको माग गरेका छन् ।

नेविसंघ, अनेरास्वियू, अखिल क्रान्तिकारी र अखिल छैटौंले सयुक्त प्रेस विज्ञप्ति जारी गर्दै दोषीमाथि कारबाहीको माग गरेका हुन् ।