’महिलामाथि ढलान काँटीले आक्रमण गर्ने सार्वजनिक’ : आक्रमण मच्चाउर्ने व्यक्ति यी नै हुन्

काठमाण्डौ , असार १३ । प्रहरीले काठमाण्डौको विभिन्न स्थानमा ‘सुई आतंक’ मच्चाउने व्यक्तिलाई पक्राउ गरी सार्वजनिक गरेको छ ।

महानगरीय प्रहरी परिसर, काठमाण्डौले काठमाण्डौको स्वयम्भू र सोह्रखुट्टे एरियामा युवतीहरुलाई जथाभावी सुई घोच्दै हिँडने रामेछापका सन्तोष कार्कीलाई बिहीबार राति १० बजेतिर महाराजगञ्जबाट पक्राउ गरी शुक्रबार बिहान पत्रकार सम्मेलनमार्फत् सार्वजनिक गरेको हो ।

पीडित युवतीहरुले दिएको उजुरीको आधारमा कार्कीलाई पक्राउ गरिएको महानगरीय प्रहरी परिसर, काठमाण्डौका प्रमुख एसएसपी उत्तमराज सुवेदीले जानकारी दिए ।

काठमाण्डौको महाराजगञ्जमा आफ्नै दाजुसँग मिलेर रेष्टुरेन्ट सञ्चालन गर्दै आएका कार्कीले बेलुका नौ बजेतिर आफ्नो रेष्टुरेन्टबाट फर्कने क्रममा स्वयम्भू र सोह्रखुट्टे क्षेत्रमा एकान्तमा भेटिएका महिलाहरुमाथि काठको छेस्को वा धलौटको काटीले घोच्ने गरेको उनको प्रारम्भिक बयानबाट खुल्न आएको पनि प्रहरीले जनाएको छ ।

नैकाप बस्दै आएका कार्कीले प्रयोग गर्दै आएको बा ४७ प १३३१ नम्बरको मोटरसाइकल पनि प्रहरीले बरामद गरेको छ ।

केही दिन अघिदेखि विभिन्न समाचार माध्यम र सामाजिक सञ्जालमा समेत यो घटनाले सनीसनी मच्चाएपछि प्रहरीले पीडित युवतीको उजुरीको आधारमा खोजतलासको कामलाई तीव्रता दिएको थियो ।

यस घटनामा हालसम्म कार्कीको मात्रै संलग्नता रहेको पनि प्रहरीको प्रारम्भिक अनुसन्धानमा उल्लेख गरिएको छ ।