निर्माणाधीन रसुवागढी जलविद्युत् आयोजनामा सुख्खा पहिरो, १७ कामदार सुरुङभित्रै थुनिए

काठमाडौं, असार ६ । निर्माणाधीन रसुवागढी जलविद्युत् आयोजना क्षेत्रमा सुख्खा पहिरा गएको छ ।

१११ मेगावाटको निर्माणाधीन रसुवागढी जलविद्युत् आयोजना क्षेत्रमा सुख्खा पहिरो जादाँ रसुवागढी जलविद्युत् आयोजनामा कार्यरत १७ कामदार सुरुङभित्र अलपत्र परेका छन् ।

गएराति सुरुङको बाहिरी भागमा सुक्खा पहिरो जाँदा ती कामदार भित्र थुनिएर अलपत्र परेको जिल्ला प्रहरी प्रमुख भागेन्द्र पुरुष ढकालले बताए ।

कामको सिलसिलामा सुरुङभित्र ११ नेपाली र छ चिनियाँ नागरिक भएको र उनीहरूको उद्धारका लागि नेपाल प्रहरी, नेपाली सेना र सशस्त्र प्रहरी बल जुटिरहेको प्रहरी प्रमुख ढकालले जानकारी दिए ।

सदरमुकाम धुन्चेबाट २८ किलोमिटर उत्तरमा घटनास्थल रहेको र सुरुङभित्रका कामदार सुरक्षित रहेको आयोजना प्रमुख छवि गैरेले जानकारी दिए ।

रसुवाका प्रमुख जिल्ला अधिकारी अर्जुन भण्डारीको नेतृत्वमा उद्धार कार्य तीव्ररुपमा भइरहेको छ । घटनाको थप विवरण आउन बाँकी नै रहेको छ ।