दुई दिने उद्यमशील एक्सपो आजदेखि काठमाडौंमा सरु

काठमाण्डौ, १ जेठ । व्यवसाय र उद्यमशीलता विकासका लागि ‘नेपाल इण्डिया फ्रान्चाइस इन्भेष्टमेण्ट एक्सपो एण्ड कनकेल्भ’ बुधबारदेखि काठमाडौंमा सुरु भएको छ ।

जेठ १ देखि २ गतेसम्म दरबारमार्ग स्थित याक एण्ड यती होटलमा हुने यो एक्सपोमा राष्ट्रिय तथा अन्तर्राष्ट्रिय ब्राण्डका झण्डै ६० समूह सहभागी हुने छन् ।

मंगलबार आयोजित पत्रकार सम्मेलनमा नेपाल उद्योग वाणिज्य महासङ्घका अध्यक्ष भवानी राणाले स्वदेशमा अन्तर्राष्ट्रिय ब्राण्डका आकर्षण र व्यावसायिक सम्बन्ध विस्तारका लागि एक्सपो गर्न लागिएको जानकारी दिनुभयो । नेपाली ब्राण्डलाई स्तरोन्नति गर्न सहयोग पुग्ने एक्सपोले वैदेशिक लगानीको वातावरण बन्ने र रोजगारी सिर्जनामा सहयोग पुग्ने अध्यक्ष राणाको भनाइ थियो ।

नेपाल उद्योग वाणिज्य महासङ्घ र नेपालस्थित भारतीय दूतावासको सहयोगमा हुने यस कार्यक्रममा छिमेकी दुई देशबीचका व्यवसायीले लगानीका लागि प्रविधि, कृषि उत्पादन, पर्यटन व्यवसायलगायत क्षेत्रमा सम्भावनाको खोजी गरिने छ । एक्सपोमा भारतीय ब्राण्डका विभिन्न उत्पादनलाई नेपालमा कसरी व्यावसायिक गन्तव्य बनाउन सकिन्छ भन्ने विषयमा छलफल गरिने बताइएको छ । त्यस्तै यसबीच दुवै देशका उद्यमी तथा व्यवसायीबीच व्यापार तथा आर्थिक विकासबारे अन्तक्र्रियासमेत सञ्चालन गरिने समेत आयोजकले जनाएको छ ।