बस र ट्रक ठोकियो, १८ यात्रु घाइते, दुईको अवस्था गम्भिर

काठमाडौं, १२ चैत । गोरखाको आबुखैरेनी सडक अन्तर्गत गोरखा नगरपालिका–१३, पाँच किलोमा यात्रुवाहक बस र ट्रक एक आपसमा ठोकिंदा १८ यात्रु घाइते भएका छन् । भने दुईको अवस्था गम्भिर रहेको छ ।

तनहुँको आबुखैरेनीबाट अवुँवा हुँदै गोरखाको पालुङटार नगरपालिका–९ शेरातर्फ आउँदै गरेको ना. ७ ख २०७० नम्बरको यात्रुवाहक बस र गोरखाबाट आबुखैरेनी जाँदै गरेको ना.५ ख ५८११ नम्बरको ट्रक एक आपसमा ठोकिएर दुर्घटना भएको हो । दुर्घटना हुँदा बसमा सवार यात्रु घाइते भएका हुन् ।

घाइते मध्ये दुइको अवस्था गम्भिर रहेको गोरखा प्रहरी कायालयले जनाएको छ । गम्भिर घाइतेलाई तनहुँको आबुखैरेनी स्थित छिम्केश्वरी अस्पतालमा सामान्य उपचार पश्चात चितवनको पुरानो मेडिकल कलेज रिफर गरिएको छ । अन्य १६ सामान्य घाइतेहरु छिम्केश्वरी अस्पतालमा उपचाररत छन् । घाइतेहरुको थप विवरण आउन बाँकी रहेको प्रहरीले जनाएको छ । थप जानकारी आउन बाँकी छ ।