जनताको मन जित्ने कार्यशैली अपनाउन प्रधानमन्त्रीलाई विवेकशील साझा पार्टीको सुझाव

जागरण न्युज
काठमाडौं, फागुन ३ । सरकारले एक वर्षको कार्यकाल पुरा गरेकोमा विवेकशील साझा पार्टीले प्रधानमन्त्री केपी ओलीलाई बधाई दिएको छ ।

दुई–तिहाईको ऐतिहासिक शक्ति बोकेको सरकार हुँदाहुँदै पनि सरकारको काम–कारवाही निराशाजनक देखिएकोले पार्टीले चिन्ता व्यक्त गरेको छ ।

पार्टी प्रवक्ता डा. सूर्यराज आचार्यद्वारा जारी विज्ञप्तिमा भनिएको छ, ‘भ्रष्टाचार चुलिंदो छ । दण्डहीनताले प्रश्रय पाईरहेको छ । अर्थतन्त्रका प्रमुख सूचकहरुको संकेत नकारात्मक छन् । निजी क्षेत्र र लगानीकर्तामा उत्साह छैन । विकास र पूर्वाधार निर्माणमा अलमल र चरम नैराश्य छ ।’
समाजवाद–उन्मुख भनिएको राज्य विपन्न र गरिब जनताको झुपडीमा पुग्ने कुनै संकेत नदेखिएको जारी विज्ञप्तिमा भनिएको छ ।
विज्ञप्तिमा यो पनि भनिएको छ, ‘समग्रमा भन्नु पर्दा विकास र संवृद्धिलाई मूल नारा बनाएको सरकारले सो हासिल गर्न लागि रणनैतिक प्रस्थान बिन्दु नै पहिल्याउन सकेको छैन, त्यस्तै, लोकतान्त्रिक अधिकार र नागरिक स्वतन्त्रता खुम्च्याउने गरी कानून निर्माण हुँदै गरेको प्रति पार्टीले चिन्ता व्यक्त गरेको छ । ’

वैदेशिक सम्बन्धलाई राष्ट्रहितमा डोर्याउन आवश्यक कुटनैतिक चातुर्यतामा सरकार पटक–पटक चुकेको बताउँदै हाम्रो मौलिक संस्कृति र राष्ट्रिय स्वाभिमानप्रति समेत सरकारको असंवेदनशीलता बेलाबखतमा प्रकट हुनु खेदजनक भएको पार्टीको ठहर छ ।

विगत एक वर्षको गंभिर समीक्षा गरी अगाडिको बाटो तय गर्नका लागि विवेकशील साझा पार्टी सरकारलाई आग्रह गर्दै पार्टीले भनेको छ, ‘यो घडीमा सरकारका काम कारवाहीप्रति आलोचनात्मक भएर प्रधानमन्त्री स्वयंले अशोभनीय भाषा प्रयोग गर्दै असहिष्णु हुनु भन्दा आलोचनालाई सकारात्मकरूपमा ग्रहण गरी आम जनताको मन जित्ने कार्यशैली अपनाउन हामी सरकारलाई सुझाव दिन चाहन्छौं ।’