सवारी दुर्घटना न्युनिकरणको लागि “ट्राफिक कम्युनिकेशन एप्स”सञ्चालन

काठमाडौं, २८ माघ । सवारी दुर्घटना बढिरहको अवस्थालाई मध्यनजर गर्दै ट्राफिक प्रहरीले आइतबारदेखि प्रदेश नं २ मा ‘ट्राफिक कम्युनिकेशन एप्स’ सञ्चालनमा ल्याएको छ ।
यसबाट सवारी दुर्घटना न्यूनीकरण तथा सुरक्षित यात्राका लागि विशेष सहयोग पुग्ने विश्वास छ । प्रहरी प्रधान कार्यालय, राजमार्ग सुरक्षा तथा ट्राफिक निर्देशनालयले लामो दूरीमा चल्ने यात्रुवाहक सार्वजनिक सवारीसाधन चलाउने चालक परिवर्तन भए÷नभएको जानकारी दिने उद्देश्यले उक्त एप्स सञ्चालनमा ल्याएको हो ।

सप्तरीको शम्भुनाथ नगरपालिकास्थित जिल्ला ट्राफिक प्रहरी कार्यालयमा आयोजित एक कार्यक्रमका बीच प्रदेश नं २ का प्रहरी प्रमुख प्रहरी नायब महानिरीक्षक हरिबहादुर पालले उक्त एप्सको शुभारम्भ गरेका हुन् ।
प्रहरी नायब महानिरीक्षक पालले लामो दूरीका सवारीसाधनमा एक मात्र चालक राख्दा निदाएर दुर्घटना भइरहेको निष्कर्ष निकाल्दै अब उप्रान्त सवारीसाधनले दुई चालक राख्नुपर्ने बताए ।

दुई चालक राखे÷नराखेको पत्ता लगाउनकै लागि यो एप्सको निर्माण गरिएको बताउँदै पालले उहाँले यो एपमार्फत त्यो कुरा पत्ता लगाइने र एक मात्रै चालक राख्नेलाई कारवाहीको दायरामा ल्याउने जानकारी दिए ।

लामो दूरीका सवारी चालक, बस नम्बर तथा प्रस्थान समय इन्टरनेटको सर्भरमा राखेपछि विभिन्न प्वाइन्टमा जाँचका क्रममा उही चालक भेटिएमा कारवाही गरिने व्यवस्था गरिएको प्रदेश नं २ का ट्राफिक प्रहरी प्रमुख किरण बज्राचार्यले जानकारी दिए ।
प्रदेश नं. २ मा लागू गरेपश्चात प्रभावकारी भएमा अन्य स्थानहरुमा पनि यो एप्प प्रयोजनमा ल्याउने ट्राफिक प्रहरीको योजना रहेकोछ ।