दार्चुलाका तीनवटै सीटमा वाम गठबन्धन विजयी
काठमाडौं । प्रदेश र प्रतिनिधिसभामा दार्चुलाको तीनवटै सिटमा वाम गठबन्धनका उम्मेदवारहरु विजयी भएका छन् ।
प्रतिनिधिसभा तर्फ नेकपा एमालेका केन्द्रीय सदस्य एवं पूर्वसांसद गणेशसिंह ठगुन्ना विजयी भएका छन् । ठगुन्नाले २८ हजार ९ सय ९८ मत प्राप्त गर्दै विजयी भएका हुन् ।
उनका निकटतम प्रतिस्पर्धी नेपाली कांग्रेसका उम्मेदवार विक्रमसिंह धामीले २२ हजार २ सय ३३ मत पाएका छन् । वाम गठबन्धन उम्मेदवार ठगुन्नाभन्दा धामी ६ हजार ७ सय ६५ मतान्तरले पछि परे ।
त्यस्तै प्रदेशसभा तर्फका दुबै निर्वाचन क्षेत्रमा पनि वाम गठबन्धन उम्मेदवार विजयी भएका छन् । प्रदेशसभा क्षेत्र नम्बर ‘क’मा नेकपा एमालेका गेल्बुसिंह बोहरा विजयी भएका छन् । बोहरा १६ हजार ५३ मतका साथ विजयी भएका हुन् ।
बोहराले ३ हजार ४ सय ५५ मतान्तरले कांग्रेस उम्मेदवार मदन गिरीलाई हराए । गिरीले १२ हजार ५ सय ९८ मत प्राप्त गरेका छन् ।
त्यसैगरी प्रदेशसभा क्षेत्र नम्बर ‘ख’मा पनि वाम गठबन्धनबाट माओवादी केन्द्रका मानबहादुर धामी ‘सन्तोष’ १२ हजार ९ सय ५६ मतसहित विजयी भएका छन् । उनका प्रत्यासी कांग्रेस उम्मेदवार जगदीश बहादुर पालले ९ हजार ५ सय ७५ मत पाए ।
प्रतिक्रिया दिनुहोस्