ट्रकले मोटरसाइकललाई ठक्कर दिँदा बाबु–छोराको ज्यान गयो

काठमाडौं । पाल्पा–बुटवल सडकखन्डको तिनाउ गाउँपालिका–३, सिद्धबाबानजिकै आइतबार ट्रकले मोटरसाइकललाई ठक्कर दिँदा दुईजनाको मृत्यु भएको छ ।

मृत्यु हुनेमा पाल्पाको माथागढी गाउँपालिका–२, आँपटारीका ५० वर्षीय माधव कुमाल र १९ वर्षीय उमेश कुमाल छन् । मृतक दुवैजना बाबु–छोरा हुन् ।

ट्रकले अगाडि गुडिरहेको मोटरसाइकललाई ठक्कर दिँदा मोटरसाइकलमा रहेका दुवैजना सडकबाट करिब २५० मिटर तल तिनाउखोला किनारमा खस्दा मृत्यु भएको क्षेत्रीय ट्राफिक कार्यालय बुटवलले जनाएको छ ।

पाल्पाबाट बुटबल आउँदै गरेको ट्रकले सोही दिशातर्फ आइरहेको मोटरसाइकललाई ठक्कर दिँदा सो दुर्घटना भएको हो ।

मोटरसाइकल सडकभन्दा केही तल भीरमा अड्केको छ । ट्रक र ट्रक चालकलाई नियन्त्रणमा लिएको प्रहरीले जनाएको छ ।