आगामी वर्ष देखि ७७ जिल्लामा स्वास्थ्य बीमा कार्यक्रम लागू गरिने : मन्त्री यादव

काठमाडौँ । उपप्रधानमन्त्री एवं स्वास्थ्यमन्त्री उपेन्द्र यादवले हाल २३ जिल्लामा सञ्चालित स्वाथ्य बीमा कार्यक्रम आगामी आर्थिक वर्ष देखि ७७ जिल्लामा लागू गरिने बताएका छन् ।
उनले स्वास्थ्य बीमा कार्यक्रम अगाडि बढाउन सरकारले उपयुक्त बजेट व्यवस्था गरेको पनि बताए ।

राष्ट्रियसभाको आईतवारको बैठकमा विनियोजन विधेयक अन्तर्गत स्वास्थ्य मन्त्रालय माथि सांसदले उठाएको प्रश्नको जवाफ दिँदै उनले जनशक्तिको व्यवस्थापनमा जोड दिँदै स्वास्थ्य उपकरण, औषधि तथा अन्य कार्यक्रमलाई प्रभावकारी रुपमा अगाडि बढाउन सरकारले केन्द्र, प्रदेश र स्थानीय तहमा योजनाबद्ध रुपमा कार्यक्रम शुरु गर्न लागेको बताए ।

मन्त्री यादवले स्वास्थ्य मन्त्रालय मातहतका कार्यालयहरुमा कर्मचारीको अभाव रहेकाले तत्काल जनशक्ति उपलब्ध गराइदिन लोकसेवा आयोगलाई आग्रह गरिएको जानकारी दिए । यस्तै वर्षाकालमा हुने महामारी तथा रोगका जोखिम न्यूनीकरणका लागि सरकारले योजनाबद्ध रुपमा कार्यक्रम सञ्चालन गर्न लागेको तथा केही स्वास्थ्य संस्थाको पुनःनिर्माण भइसकेको र केही निर्माणका क्रममा रहेको उनले बताए ।

सांसद विमला पौडेल र अनिता देवकोटाले मन्त्री यादवसँग स्पष्टीकरण मागेका थिए ।