विश्व कपमा समूह चरणका अन्तिम ४ खेल आज

(एजेन्सी) । रसियामा जारी विश्वकपमा आज हुने ४ खेलसँगै समूह चरणका सबै खेल समाप्त हुनेछन् । नकआउट चरण पुग्ने १४ टोलीको टुंगो यसअघि नै लागिसकेको छ भने आजको खेलबाट अन्तिम २ टोलीको टुंगो लाग्नेछ । समूह ‘एच’बाट नकआउट चरणमा कुन टोली पुग्ने टुङ्गो आज हुने २ खेलबाट हुनेछ ।

समूहको शीर्ष स्थानमा रहेको जापान र सेनगलको समान ४ अंक छ । कोलम्बियाको ३ अंक छ भने प्रतियोगिताबाट बाहिरिसकेको पोल्यान्डले अंक जोड्न सकेको छैन । समूह चरणको अन्तिम खेलमा जापानले पोल्यान्डको र सेनेगलले कोलम्बियाको सामना गर्नेछ ।

आजै समूह ‘जी’का पनि अन्तिम २ खेल हुनेछन् । जसमध्ये नकआउट चरणमा पुगिसकेका इङ्ल्यान्ड र बेल्जियमबीचको खेलले समूह विजेताको टुंगो लाग्नेछ । पानामा र ट्युनिसियाको खेल भने प्रतिष्ठानका लागि मात्र हुनेछ । दुवै टोली प्रतियोतिगाबाट बाहिरिसकेका छन् ।

इङ्ल्यान्ड र बेल्जियम भने यसअघि लगातार दुई खेल जित्नै नकआउट चरणमा पुगिसकेका छन् ।

एसियाली मुलुकबाट नकआउट चरण पुग्ने सम्भावना अब जापानको मात्र बाँकी रहेको छ । प्रतियोगिताबाट बाहिरिएपनि समूह चरणको अन्तिम खेलमा दक्षिण कोरियालले साविक विजेता जर्मनीलाई २–० ले स्तब्ध पारेको छ ।

जापानले पोल्यान्डलाई हराउन सके टोली नकआउट चरण पुग्नेछ । बराबरी वा हारले पनि टोली अघि बढ्ने सम्भावना रहन सक्छ । त्यसका लागि अर्को खेलको नतिजामा भर पर्नुपर्नेछ । सेनेगलले कोलम्बियालाई वा कोलम्बियाले सेनेगललाई हराएको खण्डमा जापान पोल्यान्डसँग पराजित भएपनि अघि बढ्न सक्नेछ ।

विश्व कपमा आज हुने खेल
समूह ‘एच’
जापानविरुद्ध पोल्यान्डः साँझ ७ः४५ बजे
सेनेगलविरुद्ध कोलम्बियाः साँझ ७ः४५ बजे
समूह ‘जी’
इङ्ल्यान्डविरुद्ध बेल्जियम रातीः ११ः४५ बजे
पानामाविरुद्ध ट्युनेसिया रातीः ११ः४५ बजे