रुकुम पश्चिमको सानीभेरीमा बाढीले एउटा घर, दुई वटा किराना पसल, एउटा गोठ र १० वटा पानी घट्ट बगाए
काठमाडौं, २० असोज । वर्षाका कारण रुकुम पश्चिमको सानीभेरी गाउँपालिका-१० मा भारी वर्षापछि अर्माखोलामा आएको बाढीले ठूलो क्षति पुर्याएको छ ।
वडाध्यक्ष टिकाराम खड्काका अनुसार बाढीले एउटा घर, दुई वटा किराना पसल, एउटा गोठ र १० वटा पानी घट्ट बगाएको छ ।
राति साढे ८ बजेतिर परेको भारी वर्षापछि आएको बाढीले उज्वन खड्काको घर बगाएको छ । ठूलो बाढी आएको थाहा पाएपछि खड्काका परिवार घर छाडेर सुरक्षित स्थान गएर बसेका थिए ।
बाढीले खड्काको घर बगाउँदा एक तोला सुनका गरगहना, १० हजार नगद, भाँडावर्तन, अन्नपात, एउटा भैंसी र १० वटा भेंडाबाख्रा बगाएको अध्यक्ष खड्काले बताए ।
बाढीले स्थानीय खड्कबहादुर खडका र बमबहादुर विकको किराना पसल, गंगाराम खड्काको गोठ सहित तीन वटा भैंसी र पञ्चराम डाँगीको दुई वटा गोरु बगाएको छ ।
जिल्ला प्रहरी कार्यालय रुकुम पश्चिमका डीएसपी वेद पौडेलले रातिको भारी वर्षापछि ठाडोखोलामा आएको बाढीले केही क्षति गरेको भन्ने जानकारी पाएको बताए ।
उनले भने, ‘राति गाउँलेबाट बाढीले क्षति पुगेको भन्ने जानकारी आएको थियो । मानवीय क्षति भएको छैन भन्ने जानकारी पायौं । घटनास्थल टाढा भएकाले आज बिहानै प्रहरीको टोली घटनास्थल गइसकेको छ । त्यसपछि थप विवरण आउला ।’
प्रतिक्रिया दिनुहोस्