ट्युनिसियाविरुद्ध बेल्जियमको शानदार जीत

एजेन्सी । बेल्जियमले रुस विश्वकपमा समूह ‘जी’ अन्तर्गत शनिबार बेलुका भएको खेलमा बेल्जियमले ट्युनिसियालाई ५–२ गोलको फराकिलो अन्तरले हरायो।

बेल्जियमको यो लगातार दोस्रो जित हो । समूहको पहिलो खेलमा नव प्रवेशी पानामालाई ३–० गोलले हराएको बेल्जिमयले अघिल्लो चरणमा पुग्ने लगभग पक्का भएको छ ।

खेलभर एकपक्षीय प्रर्दशन गरेको बेल्जिमयले छैटौं मिनेटमा पेनाल्टीमार्फत् खाता खोलेको थियो । बेल्जियमका लागि इडन हाजाड र रोमेलु लुकाकुले दुई–दुई गोल गरे । अर्को गोल मिची बात्सुआईले गरे ।

छैटौं मिनेटमा पाएको पेनाल्टीलाई हाजाडले सही सदुपयोग गर्दै टोलीको उत्साह बढाएका थिए । ट्युनिसियाका सायम बेनले हाजाडलाई फल हानेपछि बेल्जियमले पेनाल्टीको मौका पाएको थियो । टोलीका लागि दुई गोल गरेका हाजाडले अर्को गोल ५१ औं मिनेटमा गरे।

त्यसअघि लुकाकुले १६ औं र ४५ ओं मिनेटमा गोल गरेका थिए। लुकाकु जारी विश्वकपमा सर्वाधिक गोल गर्ने खेलाडीको सूचीमा पुगेका छन् । चार गोल गरिसकेका लुकाकुल पोर्चुगलका क्रिस्टियानो रोनाल्डोसँगै शीर्ष स्थानमा छन्।

बेल्जियमको लय र लुकाकुको यही गति कायम रहे लुकाकु रुस विश्वकपमा गोल्डन बुटको प्रवल दाबेदार बन्ने देखिएको छ । मिचीले दोस्रो हाफको इन्जुरी समयमा पाँचौं गोल गर्दै टोलीको जित शानदार बनाए।

यसैगरी ट्युनिसियाका लागि डाइलान ब्रोनले १८औं मिनेटमा गोलगर्दै टोलीलाई खेलमा फर्काउने प्रयास गरेका थिए। त्यसपछि लगातार दबाब झेलेको ट्युनिसियाले दोस्रो हाफको इन्जुरी समयमा दोस्रो सान्त्वना गोल फर्काएको थियो । उसका लागि वाहबी खाजरीले दोस्रो गोल गरे। जितसँगै ६ अंक बनाएको बेल्जियम समूहको शीर्ष स्थानमा छ । तीन अंक बनाएको इङ्ल्यान्ड दोस्रो स्थानमा छ । ट्युनिसिया र पानामाले खाता खोल्न सकेका छैनन्।