कांग्रेस गौरादहको नेतृत्वमा नयाँ पुस्ताको दाबी, भानु आचार्य नगर सभापति पदको उम्मेदवार

झापा, ६ असोज । नेपाली कांग्रेसको झापा गौरादहको नगरको नेतृत्वका लागि इन्जिनियर भानु आचार्यले सभापति पदमा उम्मेदवारी अघि सारेसँगै गौरादहको आन्तरिक राजनीतिमा नयाँ पुस्ताको प्रवेश भएको छ।

पार्टी संगठनलाई थप गतिशील बनाउने, युवाको सहभागिता बढाउने र नयाँ सोचका साथ कांग्रेसलाई अघि बढाउने उद्देश्यसहित आफू नगर सभापति पदको उम्मेदवारका रूपमा अघि बढेको आचार्यको भनाइ छ।

राजनीतिसँगै सामाजिक तथा युवा अभियानमा समेत सक्रिय रहँदै आएका आचार्यले गौरादह जेसीज, लायन्स क्लब अफ युनाइटेड गौरादह तथा सारथी क्लबमा महत्वपूर्ण जिम्मेवारी निर्वाह गरिसकेका छन्। ती संस्थामार्फत सामाजिक सेवा, युवा परिचालन तथा सामुदायिक गतिविधिमा सक्रिय रहँदै आएको उनको अनुभवलाई अहिलेको राजनीतिक यात्रामा समेत उपयोगी आधारका रूपमा हेरिएको छ।

आचार्यको उम्मेदवारीलाई समर्थकहरूले गौरादह कांग्रेसको नेतृत्वमा युवापुस्ताको दाबीका रूपमा व्याख्या गरेका छन्। सामाजिक क्षेत्रमा समेत सक्रिय रहँदै आएका युवा पुस्तालाई पार्टी नेतृत्वमा स्थापित गर्नुपर्ने आवाज उठिरहेका बेला आचार्यको उम्मेदवारीले नगर अधिवेशनलाई थप रोचक बनाउने देखिएको छ।

आचार्यले पार्टीभित्रको आन्तरिक एकता कायम गर्दै संगठनलाई वडा तहसम्म थप मजबुत बनाउने, युवा तथा नयाँ पुस्तालाई पार्टीसँग जोड्ने र कांग्रेसका संगठनात्मक गतिविधिलाई प्रभावकारी बनाउने विषयलाई प्राथमिकतामा राख्ने बताएका छन्।
गौरादह जेसीज, लायन्स क्लब अफ युनाइटेड गौरादह र सारथी क्लबजस्ता संस्थामा जिम्मेवारी सम्हाल्दा प्राप्त संगठनात्मक तथा सामाजिक अनुभवलाई पार्टी संगठन निर्माणमा जोड्ने उनको भनाई छ।

आचार्य विद्यार्थी राजनीतिमा सक्रिय रहेका बखत पुल्चोक इञ्जीनियरिङ क्याम्पसका एक सशक्त नेताका रूपमा आफूलाई स्थापित गरेका ब्यक्ति हुन । उनले युवा पुस्तासँग प्रत्यक्ष संवाद र सामाजिक गतिविधिमा सक्रियताको अनुभवलाई राजनीतिक यात्राको महत्वपूर्ण आधारका रूपमा अघि सारेका छन्।

उनको उम्मेदवारीसँगै गौरादह नगर कांग्रेसको आगामी नेतृत्वका विषयमा राजनीतिक बहससमेत सुरु भएको छ। नगर सभापतिको निर्वाचनमा विभिन्न समूह तथा आकांक्षीहरूबीच प्रतिस्पर्धा हुने देखिएपछि कांग्रेसको स्थानीय राजनीति थप तात्ने संकेत देखिएको छ।

आचार्यको उम्मेदवारीलाई ‘नयाँ पुस्ताको उदयका रूपमा हेरिएको छ। अब उनको उम्मेदवारीले पार्टीका पुराना पुस्ता, युवा कार्यकर्ता र नगरस्तरको संगठनमा कस्तो प्रभाव पार्छ भन्ने विषय आगामी निर्वाचनको परिणामसँगै स्पष्ट हुनेछ। नेतृत्व चयन भने कांग्रेसको आन्तरिक लोकतान्त्रिक प्रक्रियाबाट हुने भएकाले अन्तिम निर्णय निर्वाचनबाटै हुने छ। कांग्रेसको नगर अधिवेशन भोलि बुधबार हुँदैछ ।