हेमबहादुर मल्ल सम्मान श्रेष्ठ र खनाललाई, हाम्रो समाजलाई प्रविधिको भन्दा नैतिकता, आचरण र इमान्दारिताको अझ बढी खाँचो: राष्ट्रपति

काठमाडौं, ८ भदौं । राष्ट्रपति रामचन्द्र पौडेलले हाम्रो समाजलाई प्रविधिको भन्दा नैतिकता, आचरण र इमान्दारिताको अझ बढी खाँचो भएको बताएका छन् । नेपाल जनप्रशासन सङ्घद्वारा आयोजित हेमबहादुर मल्ल सम्मान वितरण कार्यक्रमलाई सम्बोधन गर्दै उनले प्रविधि र क्षमता अरूबाट लिएर पनि उपयोग गर्न सकिने तर आचरण, नैतिकता र इमान्दारिता आफुभित्रकै अन्तरह्रदयमा भएकाले यो शिक्षा अझ बढि खाँचो भएको बताए हुन् ।

उनले आधुनिक प्रविधिसँगै आधुनिक प्रशासन चाहिने भए पनि आधुनिक प्रशासनको आधार पनि नैतिक र जिम्मेवार नेतृत्व नै हो भन्ने भावलाई बिर्सन नहुने बताउँदै उनले भने– ‘मलाई लाग्दछ, आज हाम्रो समाजलाई त्यही नैतिकता, आचरण र इमान्दारिताको अलिक बढी खाँचो छ ।’

उनले हेमबहादुर मल्ल सम्मान एक अलस र इमान्दार प्रशासक भएको पहिचान स्वरुप वितरण गरिएको औल्याए । उनले प्रविधिको विकास र परिवर्तनको गति आजको युगमा तीव्र भएकाले उल्लेख गर्दै भने– ‘कृत्रिम बुद्धिमत्ता, डिजिटल शासन, विश्वव्यापीकरण र नयाँ आर्थिक संरचनाले प्रशासन र व्यवस्थापनका परम्परागत अभ्यासलाई समयसँगै बदलिदिएको छ । परन्तु प्रविधि परिवर्तन भए पनि केही मूल्य कहिल्यै पुराना हुँदैनन्– इमानदारी, अनुशासन, जिम्मेवारी, नैतिकता, मानवता र सार्वजनिक हितप्रतिको प्रतिबद्धता ।’

उनले मुलुकको बदलिँदो परिवेशमा जनताको विकासको चाहनालाई सुशासनका माध्यमबाट पूरा गर्नुपर्ने भन्दै सूचना प्रविधिको विकाससँगै विस्तार भएको विश्वव्यापीकरण र आधुनिकीकरणको वर्तमान समयमा राज्यको सफलता र विकासको मापन केवल आर्थिक विकासको सूचकबाट मात्र हेर्न नहुने बताए ।

उनले भने, ‘जनताले राज्यबाट झन्झटरहित तरिकाले पाउने छिटोछरितो गुणस्तरीय सेवा, निर्णय प्रक्रियाको पारदर्शिता, संस्थाको जबाफदेहिता, न्यायपूर्ण व्यवहार, विधिको शासन र सार्वजनिक संस्थाप्रतिको विश्वास हो भन्ने पनि हामीले बिर्सनुहुँदैन ।’

राष्ट्रपति पौडेलले वास्तवमा दिगो विकास सक्षम संस्था, दक्ष संस्थागत नेतृत्वसहित उच्च नैतिकता, व्यावसायिकता र उत्तरदायित्वको संस्कृतिमा निर्भर रहने उल्लेख गर्दै भने– ‘यसमा नेपाल जनप्रशासन सङ्घजस्ता पेसागत तथा प्राज्ञिक संस्थाले नीति निर्माण, प्रशासनिक सुधार, सार्वजनिक सेवा प्रवाह र सुशासनका क्षेत्रमा विगतमा जस्तै अझै प्रभावकारी भूमिका निर्वाह गर्ने विश्वास मैले लिएको छु ।’

उनले नेपाल जनप्रशासन सङ्घ र साल्ट ट्रेडिङ कर्पोरेसनले एक सफल प्रशासक तथा व्यवस्थापकका रूपमा स्थापित स्वर्गीय हेमबहादुर मल्लको योगदानलाई सदा स्मरणीय बनाउन सम्मान कार्यक्रमलाई यसरी निरन्तरता दिनु खुसीको विषय भएको भन्दै राज्य, पेसागत संस्था, सार्वजनिक संस्थान र समाजबिचको सहकार्यले राष्ट्रनिर्माणका लागि आवश्यक सकारात्मक मूल्यहरूलाई संस्थागत गर्न सक्न टेवा पुग्ने विश्वास व्यक्त गरे ।

उनले सबैको साझा प्रयासबाट मात्र न्यायपूर्ण, सक्षम, उत्तरदायी र समृद्ध नेपाल निर्माण गर्न सकिने भन्दै सङ्घीय लोकतान्त्रिक गणतन्त्रलाई सुदृढ बनाउँदै नागरिकको अपेक्षाअनुरूप देश विकासको चाहनालाई मूर्तरूप दिनु सबैको साझा दायित्व भएको उल्लेख गरे ।

राष्ट्रपति पौडेलले हेमबहादुर मल्ल सम्मानबाट सम्मानित भएका डा।रामकण्ठ माकजू श्रेष्ठ र रामेश्वरप्रसाद खनाललाई बधाई दिदैँ उनीहरू आफ्नो सार्वजनिक सेवाप्रतिको समर्पण र राष्ट्रनिर्माणप्रतिको योगदानबाट सम्मानित भएको स्पष्ट पारे ।

डा।रामकण्ठ माकजू श्रेष्ठलाई हेमबहादुर मल्ल सम्मान २०८१ र रामेश्वरप्रसाद खनाललाई हेमबहादुर मल्ल सम्मान २०८२ द्वारा सम्मान गरिएको थियो । दुबै सम्मानको राशी दुई लाख सहित ताम्रपत्र रहेको छ ।
कार्यक्रममा सम्मान छनोट समितिका संयोजक तथा नेपाल जनप्रसासशनका अध्यक्ष मधुरमण आचार्य, साल्ट टे«डिङ्ग कर्पोरेशनका अध्यष प्रदिपलाल श्रेष्ठ, सम्मानित व्यक्तित्व डा. रामकण्ठ माकजू श्रेष्ठ र रामेश्वरप्रसाद खनालले पनि आ-आफ्नो मन्तव्य राख्नु भएको थियो ।