इजिप्टलाई हराउँदै रसियाको अर्को जीत

फिफा विश्वकप २०१८ अन्तर्गत मंगलबार आयोजक रसियाले इजिप्टलाई ३–१ ले पराजित गर्दै रसिया दोस्रो चरणमा पुग्ने सम्भावना प्रबल बनेको छ ।

दुवै टोलीले पहिलो हाफमा गोल गर्न नसक्दा मध्यान्तरमा खेल गोलरहित बराबरीमा रहयो । दोस्रो हाफको सुरुमै रसियाको गोल गर्दै इजिप्ट पछाडी पर्यो । गोल अहमद फाथीको आत्मघाती भएको थियो ।
लगत्तै ५९ औं मिनेटमा डेनिस चेरेसेभले अग्रता दोब्बर पारे भने त्यसको तीन मिनेटमा आर्टेम ज्युबाले ३–० को अग्रता बनाए ।

इजिप्टका लागि मैदानमा फर्केका मोहमद सलाहले पेनाल्टीमा गोल गरे । खेलको १७ मिनेट बाँकी छँदा गोल गरेपनि इजिप्टले त्यसपछि गोल गर्न नसक्दा ३–१ को हार बेहोर्यो । यस हारसँगै इजिप्टको दोस्रो चरण पुग्ने गणितीय सम्भावना मात्र कायम रहेको छ ।