गरिमा विकास बैंकद्वारा तीन नयाँ डिजिटल बैंकिङ सेवा सार्वजनिक

काठमाडौं, ३ असार । गरिमा विकास बैंकले नयाँ आर्थिक वर्ष २०८३/८४ को अवसरमा आफ्ना ग्राहकलाई थप सहज, सुरक्षित र आधुनिक बैंकिङ सेवा उपलब्ध गराउने उद्देश्यले तीन नयाँ प्रविधिमा आधारित सेवा सार्वजनिक गरेको छ।

बैंकले गरिमा प्रिपेड डलर कार्ड, गरिमा बिक्री केन्द्र भुक्तानी सेवा (पिओएस टर्मिनल) र गरिमा अन्तरबैंक क्यूआर टेलर सेवा को औपचारिक शुभारम्भ गरेको हो।

बैंकका अनुसार गरिमा प्रिपेड डलर कार्डमार्फत नेपाल राष्ट्र बैंकले तोकेको सीमाभित्र रही अन्तर्राष्ट्रिय वेबसाइट, मोबाइल अनुप्रयोग तथा विद्युतीय व्यापार मञ्चहरूमा अमेरिकी डलरमा सुरक्षित अनलाइन भुक्तानी गर्न सकिनेछ।

त्यसैगरी, बिक्री केन्द्र भुक्तानी सेवामार्फत व्यवसायीले डेबिट, क्रेडिट तथा प्रिपेड कार्ड प्रयोग गरी सुरक्षित, छिटो र भरपर्दो डिजिटल भुक्तानी स्वीकार गर्न सक्नेछन्। यस सेवाले नगदरहित कारोबारलाई प्रोत्साहन गर्नुका साथै व्यापारिक कारोबारलाई थप व्यवस्थित र प्रभावकारी बनाउने बैंकको विश्वास छ।

यस्तै, गरिमा अन्तरबैंक क्यूआर टेलर सेवामार्फत फोनपे सञ्जालमा आबद्ध अन्य बैंक तथा वित्तीय संस्थाका ग्राहकले आफ्नो मोबाइल बैंकिङ अनुप्रयोगबाट गरिमा बैंकको क्यूआर संकेत स्क्यान गरी गरिमा विकास बैंकको जुनसुकै शाखाबाट सहज रूपमा नगद प्राप्त गर्न सक्नेछन्।

बैंकले डिजिटल रूपान्तरणलाई प्राथमिकतामा राख्दै आगामी दिनमा पनि नवीन प्रविधिमा आधारित बैंकिङ सेवाको विस्तार गर्दै ग्राहकलाई सुरक्षित, सरल, छरितो र गुणस्तरीय सेवा प्रदान गर्ने प्रतिबद्धता जनाएको छ।

हाल गरिमा विकास बैंकले देशभर १२६ शाखा कार्यालय, ५१ स्वचालित नगद वितरण यन्त्र (एटिएम) तथा डिजिटल बैंकिङ प्रणालीमार्फत करिब ९ लाख ग्राहकलाई सेवा प्रदान गर्दै आएको छ।