पोखरा महानगरको ७ अर्ब १५ करोड रुपैयाँको बजेट प्रस्तुत, पर्यटन र पूर्वाधारलाई प्राथमिकता

प्रस्तावित बजेटअनुसार संघीय सरकारबाट सर्त, विशेष, समपूरक तथा समानीकरण अनुदानमार्फत ३ अर्ब १८ करोड ६० लाख रुपैयाँ प्राप्त हुने अनुमान गरिएको छ। यस्तै गण्डकी प्रदेश सरकारबाट समपूरक, विशेष तथा समानीकरण अनुदान गरी ९ करोड १५ लाख ३६ हजार रुपैयाँ प्राप्त हुने प्रक्षेपण गरिएको छ।

महानगरले संघीय राजस्व बाँडफाँटबाट ३४ करोड ३४ लाख ७३ हजार रुपैयाँ, प्रदेश राजस्व बाँडफाँटबाट ४ करोड १ लाख ५८ हजार रुपैयाँ, स्थानीय तह राजस्व बाँडफाँटबाट १ अर्ब ३१ लाख १४ हजार रुपैयाँ तथा आन्तरिक स्रोतबाट २ अर्ब ५८ करोड ७३ लाख ११ हजार रुपैयाँ संकलन गर्ने लक्ष्य राखेको छ। यससँगै कुल आन्तरिक आय ३ अर्ब ८७ करोड ४१ लाख ६४ हजार रुपैयाँ पुग्ने अनुमान गरिएको छ।

कुल बजेटमध्ये ५५.१ प्रतिशत रकम चालु खर्चतर्फ र ४४.९ प्रतिशत पुँजीगत खर्चतर्फ विनियोजन गरिएको छ। महानगरका ३३ वटै वडाका लागि एकमुष्ट ७२ करोड ४० लाख रुपैयाँ छुट्याइएको छ।

आर्थिक विकास कार्यक्रमका लागि १३ करोड १९ लाख रुपैयाँ, पूर्वाधार, सहरी विकास, सहरी उत्थानशीलता तथा जीवनयापन सुधार परियोजनाका लागि २ अर्ब ८९ करोड ५५ लाख रुपैयाँ विनियोजन गरिएको छ। त्यस्तै स्वास्थ्य, शिक्षा तथा सामाजिक विकास क्षेत्रका लागि २ अर्ब ९ करोड ९७ लाख रुपैयाँ छुट्याइएको छ।

बजेटमा पोखरालाई अन्तर्राष्ट्रिय पर्यटन गन्तव्यका रूपमा विकास गर्ने, आधुनिक फोहोरमैला प्रशोधन केन्द्र निर्माण गर्ने, सडक, पुल, ढल तथा खानेपानी पूर्वाधारको स्तरोन्नति गर्ने, सार्वजनिक–निजी साझेदारीमार्फत लगानी आकर्षित गर्ने तथा राजस्व सुधार योजना कार्यान्वयन गर्ने लक्ष्य समेटिएको छ।

महानगरले आर्थिक विधेयक र विनियोजन विधेयक २०८३ समेत नगर सभामा प्रस्तुत गरेको छ।

उल्लेखनीय रूपमा आगामी आर्थिक वर्षको बजेट चालु आर्थिक वर्ष २०८२/८३ को ८ अर्ब ३५ करोड १२ लाख रुपैयाँको तुलनामा १ अर्ब १९ करोड ८७ लाख रुपैयाँले कम रहेको छ।