गृहमन्त्री र उर्जामन्त्रीले भने : बिजुली चोर्नेलाई बाँकी राख्दैनौँ

काठमाडौ । बिजुली चोरी नियन्त्रण अभियानमा गृह मन्त्रालय र उर्जा मन्त्रालयले संयुक्त रुपमा काम गर्ने भएका छन् ।

बुधबार गृहमन्त्रालयमा पत्रकार सम्मेलन गरेर गृहमन्त्री रामबहादुर थापा बादल र उर्जा, जलस्रोत तथा सिँचाइमन्त्री बर्षामान पुनले विजुली चोरी गर्नेविरुद्ध संयुक्त अभियान चलाएर बाँकी नराख्ने चेतावनी समेत दिएका छन् ।

गृहसचिव प्रेम कुमार राइ, प्रहरी महानिरीक्षक सर्वेन्द्र खनाल, नेपाल विद्युत प्राधिकरणका कार्यकारी निर्देशक कुलमान घिसिङ लगायतका पदाधिकारीलाई राखेर दुइ मन्त्रीले बिजुली चोरी नियन्त्रण अभियान प्रभावकारी बनाउने घोषणा गरेका हुन् ।

गएको वर्ष राष्ट्रिय प्रणालीबाट २२ दशमलव ९ प्रतिशत बिजुली चुहावट भएकोमा यो बर्ष नेपाल विद्युत प्राधिकरणले २० दशमलव ६ प्रतिशतमा झारेको छ । आउँदो वर्ष विद्युत चुहावट १५ प्रतिशतमा झार्ने प्राधिकरणको लक्ष्य रहेको छ ।

चुहावट नियन्त्रणका लागि प्राधिकरणले चोरी नियन्त्रण गर्ने ,महशुल बक्यौता असुलीमा कडाई गर्ने, प्राविधिक चुहावट घटाउन ट्रान्सफर्मर तथा वितरण लाइनको सुदृढीकरण लगायतका काम अभियानकै रुपमा चलाइरहेको छ ।

बुधवनर भएको २ मन्त्रालयको सहमति अनुसार बिजुली चोरी नियन्त्रण गर्न हरेक जिल्ला प्रशासन कार्यालयले कार्यविधि बनाउने र चोरीविरुद्ध कडा कारबाही गरिने भएको छ । यस्तै प्रसारणलाइन र आयोजनास्थल बनाउन जग्गा अधिग्रहणको लागि जिल्ला प्रशासन कार्यालयलाई थप सक्रिय बनाउने, विद्युत आयोजनास्थलमा थप सुरक्षा महसुस भएमा गृह मन्त्रालयमार्फत तत्कालै समन्वय गर्ने र ढिलाइ भएका आयोजनामा थप कारबाही आवश्यक भएमा उर्जा मन्त्रालयको आग्रहमा थप सुरक्षा दिने पनि सहमति भएको छ ।