सेयर बजारका सबै सूचक हरियाली, कारोबार भने घट्यो
काठमाडौं,२७ असोज । सेयर बजारको परिसूचक नेप्सेमा आज सबै समूहगत सूचक बढेका छन् ।
यस दिन नेप्से परिसूचकमा ४४.२५ अंक बढेर २५४७ मा कायम भएको छ । समग्र बजार बढ्दा पनि कारोबार रकम भने घटेको छ । आइतबार ६ अर्ब ७० करोडको कारोबार भएको बजारमा आज भने ४ अर्ब ९७ करोडको भएको हो । २ सय कम्पनीको मूल्य बढ्दा ४४ को घट्यो भने ८ को स्थिर रह्यो ।
नेप्सेमा कारोबार भएका समूह मध्ये अन्य समूह सबैभन्दा धेरै ५.०१ प्रतिशत बढ्यो । बैंकिङ ०.२८, विकास बैंक १.४१, फाइनान्स १.०२, होटल तथा पर्यटन ३.३५, हाइड्रोपावर २.१०, लगानी २.२७, जीवन बीमा १.९२, उत्पादन तथा प्रशोधन १.५६, माइक्रोफाइनान्स ०.६३, निर्जीवन बीमा १.४४ तथा व्यापार समूह २.८१ प्रतिशत बढे ।
नेपाल माइक्रोइन्स्योरेन्स, नेपाल पुनर्बीमा, क्रेस्ट माइक्रोलाइफ इन्स्योरेन्सको मूल्य १० प्रतिशत बढ्यो । इमर्जिङ नेपालको ९.९, एनआरएन इन्फ्रास्ट्रक्चरको ९.८, बुटवल पावरको ८.९८, सीईडीबी होल्डिङ्सको ८.४५ प्रतिशत मूल्य बढ्यो ।
कर्पोरेट डेभलपमेन्ट बैंकको ५.२६, थ्रीस्टार हाइड्रोपावरको ४.४५, समता लघुवित्तको ३.५३ प्रतिशत मूल्य घट्यो । आज एनआरएन इन्फ्रास्ट्रक्चर, नेपाल पुनर्बीमा, सीईडीबी होल्डिङ्स, हिमालयन रिइन्स्योरेन्स र एनएलजी इन्स्योरेन्स आज सबै भन्दा धेरै कारोबार हुने कम्पनीमा परेका छन् ।
प्रतिक्रिया दिनुहोस्