प्रदेश ७ का मन्त्रीहरुको सम्पत्ति विवरण सार्वजनिक स् मन्त्री गरिव श्रीमती धनी

कैलाली । प्रदेश नम्वर ७ का मुख्यमन्त्री सहित मन्त्रीहरुको सम्पती विवरण सार्वजनिक गरिएको छ । सवै मन्त्रीको सम्पति न्यून देखिएको छ । अधिकांश मन्त्रीहरुको श्रीमतीका नाममा भने प्रशस्तै सम्पति रहेको छ ।  प्रदेश ७ का मुख्यमन्त्री त्रिलोचन भट्ट आफ्नो क्याबिनेटका सबै मन्त्रीहरु भन्दा गरीब देखिएका छन् ।

मुख्यमन्त्री कार्यालयले सार्वजनिक गरेको मन्त्रीहरुको सम्पत्ति विबरणअनुसार मुख्यमन्त्री भट्टको नाममा कहिकतै जग्गा उल्लेख गरिएको छैन् ।

केआईसिंह नगरपालिका ६ मा रहेको घर र १८ रोपनी जग्गा मुख्यमन्त्रीका दाजु शालिग्राम भट्टको नाममा रहेको छ भने अढाइ रोपनी जग्गा श्रीमति दुर्कादेवी भट्टको नाममा रहेको छ । मुख्यमन्त्रीको सम्पत्तिको नाममा ७० हजार बैंकमा नगद , मोबाइल १ थान, १ तोला सुन र १५ तोला चाँदी मात्रै रहेको पाईएको छ ।

एक लाख ४० हजार वित्तीय ऋण र २ लाख व्यक्तिगत ऋण रहेको मुख्यमन्त्रीले सार्वजनिक गरेको सम्पत्ति विवरणमा उल्लेख छ ।

प्रदेश ७ का आर्थिक मामिला मन्त्री झपटबहादुर बोहरा भने प्रदेशका अरु मन्त्रीभन्दा धनी देखिएका छन् । बोहराको काठमाडौं, गोदावरी नगरपालिका, टिकापुर र धनगढीमा समेत पत्नी, छोरा र आफ्नो नाममा जग्गा जमिन छ ।

बोहरासँग ३ थान जीप तथा कार, ४० तोला सुन र सेयर कित्ता समेत रहेको छ । सार्वजनिक गरिएको सम्पत्ति विवरण अनुसार अरु मन्त्रीभन्दा धनी देखिएका बोहराको ऋण पनि बढी नै रहेको छ ।

विभिन्न वित्तिय संस्थाहरुमा मन्त्री बोहराको झण्डै २० करोडको हाराहारीमा ऋण रहेको उल्लेख गरिएको छ भने मन्त्री बोहराले विभिन्न कम्पनीको शेयर मात्रै साढे सात करोड रुपैयाँको हाराहारीमा खरिद गरेका छन् ।

यसैगरी जग्गा आफ्नो नाममा नभएपनि समाजिक विकास मन्त्री दीर्घ सोडारी झपट बोहरा पछिको धनी मन्त्रीका रुपमा देखिएका छन् । बैंक मौजदात ५ लाख ६० हजार रहेको सोडारीको परिवारसँग कैलालीको गौरीगंगा, धनगढी, र अछाममा समेत गरी ६ वटा घर र तराईमा डेढ विघा तथा अछाममा ८ रोपनी जग्गा रहेको छ ।

उसो त आन्तरिक मामिला मन्त्री प्रकाशबहादुर शाहसँग पनि अरु मन्त्रीहरुको भन्दा बढी नै सम्पत्ति रहेको छ । सुन मात्रै ५२ तोला रहेका मन्त्रीको परिवारसँग काठमाडौंमा १ घर तथा बाजुरामा १ घर रहेको छ । यसैगरी भौतिक योजनामन्त्री पठानसिंह बोहराको परिवारसँग डडेल्धुराको परशुराम नगरापलिकामा करीब ३० रोपनी जग्गा, २ घर, ४ तोला सुन २ लाख ६४ हजार रुपैयाँ बैंकमा मौज्दात रहेको सम्पत्ति विवरणमा उल्लेख गरिएको छ ।

उद्योग पर्यटन बन तथा वातावरण मन्त्री माया भट्टसँग वैतडी दशरथचन्द(५ मा १ रोपनी जग्गा र १ घर तथा बैंक मौज्दात ५ लाख तथा १५ तोला सुन रहेको छ भने वित्तिय संस्थामा २५ लाख रुपैयाँमा ऋण देखिएको छ । त्यस्तै भूमि व्यवस्था, कृषि तथा सहकारी मन्त्री विनिता चौधरीको श्रीमानको नममा १ विघा ४ कट्ठा जग्गा छ भने बैंकमा ५० हजार र ७ तोला सुन रहेको मन्त्रीले पेश गरेको सम्पत्ति विवरणमा उल्लेख गरिएको छ ।