मधेस प्रदेशले सुख्खा क्षेत्र घोषणा गरेपछि मधेस प्रदेशका ८ जिल्लामा कृषि मन्त्रालयले अध्ययनका लागि टोली परिचालन गर्दै 

काठमाडौ, २ साउन । मधेस प्रदेशका ८ जिल्लाहरुमा सुख्खाका कारण धान रोपाइँ हुन नसके पछि कृषि तथा पशुपन्छी विकास मन्त्रालयले मधेस प्रदेशका ८ वटै जिल्लामा टोली पठाउने भएको छ । हालको अवस्था , समस्या समाधानका लागि गर्न सकिने तत्कालीन र दीर्घकालीन उपाय र विकल्प अध्यन गर्न कृषि प्राविधिकको टोलि पठाउने निर्णय भएको हो । टोली आइतवार सो क्षेत्रमा पुग्ने छ ।

शुक्रबार कृषि तथा पशुपन्छी विकासमन्त्री रामनाथ अधिकारीले मन्त्रालय र मातहतका कर्मचारीहरु संग छलफल गरि तुरुन्तै सो क्षेत्रमा टोली पठाउन निर्देशन दिनु भएको हो । मन्त्री अधिकारीको निर्देशन अनुसार प्रत्येक जिल्लामा केन्द्रवाट २/२ जनाको दरले टोली पठाउने निर्णय भएको हो। टोलीले मधेस प्रदेशमा रहेका मन्त्रालय अन्तर्गतका कार्यक्रम र आयोजनाका कर्मचारीहरु संग पनि समन्वय गर्ने छ ।

मधेस प्रदेश सरकारले लामो समय सो क्षेत्रमा पानी नपर्दा खाने पानीको समेत अभाव भएको र धान रोप्ने अवस्था समेत नभएको भन्दै केही दिन अघि सुख्खा ग्रस्थ क्षेत्र घोषणा गरेको थियो ।
मन्त्री अधिकारीले अबको केही दिन भित्र वर्षा नभएको अवस्थामा तिनै तहको सरकारले विकल्प खोज्नु पर्छ , मन्त्रालय मातहतका सबै निकायहरु लाई यस तर्फ लगाउनु पर्छ , भन्नुभयो । हाल रहेका सिंचाइका संरचनाहरुलाई पुर्णरुपमा संचालन गरी , सिचाइका लागि अन्य विकल्पहरु के के हुन सक्छन सम्बन्धित निकायहरु सङग छलफल गरि तत्कालीन र दीर्घकालीन निर्णय गरिने मन्त्री अधिकारीले जानकारी दिनुभयो ।

मधेसका ८ जिल्लामा हाल सम्म करिब ४६ प्रतिशत रोपाई सम्पन्न भएको मधेश प्रदेश कृषि मन्त्रालयले जनाएको छ ।