बौद्ध साहित्य तथा दर्शन जीवन जिउने कला हो मुख्यमन्त्री लामा

अखिल नेपाल भिक्षु महासंघद्वारा शनिबार आयोजित परियत्ती शिक्षाको ६२ औँ दिक्षान्त समारोहमा उहाँले बौद्ध साहित्य जीवन जिउने कला भएकाले मनको शान्तिका लागि बुद्ध शिक्षा तथा उपदेशको महत्वपूर्ण हुने बताउनुभयो।

मुख्यमन्त्री लामाले मानवका असीमित चाहना नै दुःखको प्रमुख कारण रहेको बताउँदै दुःख निरोधका लागि बुद्धका गहन चिन्तनले बौद्ध दर्शन तथा उपदेशको सान्दर्भिकता बढ्दै गइरहेको विचार व्यक्त गर्नुभयो।

उज्यालो नेपालका परिकल्पनाकार कुलमान घिसिङले बुद्ध दर्शनले विकास गर्ने सकारात्मक सोच मानव कल्याणका लागि उपयोगी रहेकाले यसको सान्दर्भिकता विश्वभर बढ्दै गएको उल्लेख गर्नुभयो।

बागमती प्रदेशसभा सदस्य शैलेन्द्र बज्राचार्यले बुद्धका उपदेश कार्यान्वयन हुन सकेमा समग्र प्राणिको सर्वदा कल्याण हुने बताउनुभयो।

अखिल नेपाल भिक्षु महासंघका कोषाध्यक्ष एवं परियत्ती शिक्षाका परिक्षा नियन्त्रक भिक्षु बोधिज्ञान महास्थविरले बौद्ध शिक्षाको पाठ्यक्रम विकास गरी परियत्ती शिक्षा विसं २०२० देखि संचालन गरिएको जानकारी दिँदै बौद्ध दर्शनमा आधारित जीवन विज्ञानका बारेमा प्राज्ञिक निकायले थप अनुसन्धान गर्नुपर्नेमा जोड दिनुभयो।