नेपाल राष्ट्र बैंकले आज ७० औँ वार्षिकोत्सव मनाउँदै

काठमाडौं, १४ बैशाख । नेपाल राष्ट्र बैंकले आज ७० औँ वार्षिकोत्सव मनाउँदै छ । २०१३ साल वैशाख १४ गते स्थापना भएको नेपाल राष्ट्र बैंक ६९ वर्ष पूरा गरी आजदेखि ७० वर्षमा प्रवेश गरेको छ ।

यो अवसरमा राष्ट्र बैंकले विशेष कार्यक्रम गरी मनाउँदैछ । गभर्नर नियुक्त हुन नसक्दा यसपटकको वार्षिकोत्सवमा राष्ट्र बैंक नेतृत्वविहीन अवस्थामा छ । गभर्नर महाप्रसाद अधिकारीको कार्यकाल यही चैत २३ गतेदेखि सकिएसँगै अहिले राष्ट्र बैंक अन्तरिम नेतृत्वको भरमा चलिरहेको छ ।

राष्ट्र बैंकले नेतृत्वविहीन अवस्थामा वार्षिकोत्सव मनाउन लागेको यो दोस्रोपटक हो । ७० वर्षको इतिहासमा पछिल्लोपटक ५२ वर्षघअघि राष्ट्र बैंकले नेतृत्वविना नै वार्षिकोत्सव मनाएको थियो ।

सबैभन्दा पहिलोपटक २०३० सालमा वार्षिकोत्सव मनाउँदा राष्ट्र बैंक नेतृत्वविहीन अवस्थामा थियो । गभर्नर डा. यादव पन्तको कार्यकाल सकिएपछि त्यतिवेला ११ दिनका लागि नेतृत्व खाली भएको थियो । सोही समयमा वार्षिकोत्सव पर्न जाँदा उत्सव नेतृत्वविहीन भएको हो ।

२०६६ सालमा राष्ट्र बैंक नेतृत्वविहीन भएको थियो । गभर्नर विजयनाथ भट्टराईविरुद्ध अदालतमा मुद्दा दायर भई निलम्बन परेको समयमा समेत राष्ट्र बैंक नेतृत्वविहीन रूपमा वार्षिकोत्सव मनाउनु परेन । त्यतिबेला सरकारले दीपेन्द्र बहादुर क्षेत्रीलाई गभर्नर नियुक्त गरेको थियो ।

अहिले सरकारले राष्ट्र बैंकको नेतृत्व छनोट गर्न नसक्दा नेतृत्वविहीनतामै अवस्थामा वार्षिकोत्सव मनाउनुपर्ने अवस्था सिर्जना भएको हो ।

अहिलेसम्म राष्ट्र बैंकमा १७ जना गभर्नर भएका छन् । १८ औँ गभर्नर छनोटको प्रक्रिया अहिले अवरुद्ध भएर बसेको छ । यो अवधिसम्म दीपेन्द्र बहादुर क्षेत्रीले ६ महिना, दीपेन्द्रपुरुष ढकालले साढे आठ महिना, तिलक रावलले २ पटक गरी साढे ४ वर्ष, भेषबहादुर थापाले करिब ११ महिना तथा विजयनाथ भट्टराईले पनि दुई पटक गरी साढे ४ वर्षसम्म राष्ट्र बैंकको नेतृत्व सम्हालेका थिए ।

बाँकी गभर्नरहरूले भने तोकिएको पाँच वर्ष नै कार्यभार सम्हालेका थिए । निवर्तमान गभर्नर महाप्रसाद अधिकारीविरुद्ध सरकारले गरेको कारबाहीपछि केही समय उनी पनि नेतृत्वबाट विमुख भएका थिए । अदालतको आदेशपछि उनी पुनर्बहाली भएका हुन् ।