त्रिभुवन विश्वविद्यालयमा स्वचालित प्रणाली लागू

काठमाडौं, भदौ १९ ।  त्रिभुवन विश्वविद्यालयले सेवा प्रणालीलाई छिटो, छरितो र प्रभावकारी बनाउन आफ्ना सबै निकायका कार्यालयमा विद्युतीय प्रशासन (स्वचालित प्रणाली) लागू गरेको छ।

अब त्रिविमा सम्पूर्ण कार्यालयमा हुने दर्ता, चलानी, टिप्पणी, पत्रव्यवहार, परिपत्र र निर्णयका लागि माथिल्लो निकायमा पेस गरिने कागजात स्वचालित प्रणालीमार्फत सम्पादन हुने त्रिभुवन विश्वविद्यालयले जनाएको छ।

त्रिवि केन्द्रीय कार्यालयमा यो प्रणाली गत साउन १ गतेदेखि नै लागू भएको थियो। हालसम्म यो प्रणालीका पाँच सय २९ युजर आइडी कार्यान्वयमा छन्।

विश्वविद्यालयका उपकुलपति प्राडा धर्मकान्त बास्कोटाले कीर्तिपुरस्थित रजिष्ट्रार कार्यालयमा स्वचालित प्रणालीको विधिवत शुभारम्भ गरेका हुन्।

त्रिविलाई कागजविहीन प्रशासनका रुपमा स्तरोन्नति गर्ने आफ्नो महत्वपूर्ण लक्ष्य पूरा भएको भन्दै बास्कोटाले प्रविधि कार्यालयको अनिवार्य जीवन प्रणाली बनिसकेको बताए।

‘सेवा प्रणालीलाई थप व्यवस्थित, सृदृढ र प्रभावकारी बनाउन कार्यालयमा स्वचालित प्रणाली सफल हुने विश्वास हामीले लिएका छौँ,’ बास्कोटाले भने।

अत्याधुनिक प्रविधिको प्रयोगलाई बढावा दिई तीव्र गतिको इन्टरनेट सुविधासमेत व्यवस्था गरी सेवाग्राहीलाई छिटोछरितो सेवामार्फत सन्तुष्ट बनाउन उपकुलपति बास्कोटाले निर्देशन दिएका छन्। रासस