बैंकहरुमा लगानीयोग्य पैसा बढेको बढ्यै, पुन: २० अर्ब खिच्दै राष्ट्र बैंक

काठमाडौं, असार २६ । बैंकिङ प्रणालीमा लगानीयोग्य रकम बढेसँगै नेपाल राष्ट्र बैंकले बजारबाट पुनस् २० अर्ब रुपैयाँ खिच्ने भएको छ।

राष्ट्र बैंकले एक विज्ञप्ति जारी गर्दै रिभर्स रिपोमार्फत् साउन ९ गतेसम्ममा २० अर्ब रुपैयाँ बैंकिङ प्रणालीबाट खिच्ने जनाएको छ। बैंकहरुमा हाल ४ खर्ब माथि लगानी योग्य पैसा रहेको जनाइएको छ।

आर्थिक वर्षको आखिरी दिनहरुमा सरकारी खर्च बढेको र पैसा बैंकिङ प्रणालीमा आएपछि पैसाको मात्रा बढेको हो।

राष्ट्र बैंकले यही असार महिनामा ३ पटक बैंकहरुबाट पैसा तानेको थियो। लगानीयोगय पैसा बढेसँगै अन्तर बैंकदर र ट्रेजरी बिलको दर पनि घट्दै गएको छ।