नदीमा पानी घटेसँगै निर्यात हुन छाड्यो बिजुली

काठमाडौ., पुस ४ । नेपाल विद्युत् प्राधिकरणले नदीमा जलसतह लगातार घटेपछि भारततर्फको बिजुली निर्यात रोकेको छ।

स्वदेशमै बिजुली आपूर्ति गर्नुपर्ने भएकाले भारतमा हुँदै आएको निर्यात रोकिएको प्राधिकरणका प्रवक्ता एवं भारप्रेषण केन्द्रका प्रमुख सुरेशबहादुर भट्टराईले जानकारी दिए।

प्राधिकरणले यस वर्ष कुल ११ अर्ब बराबरको बिजुली भारत निर्यात गरेको छ। गत १९ जेठदेखि भारत निर्यात सुरु गरेको प्राधिकरणले गत मंसिर अन्तिम सातासम्म निर्यात गरेको थियो। सुरुमा ३९ मेगावाटबाट निर्यात सुरु गरेको प्राधिकरणले कुल ४१९ मेगावाटसम्म निर्यात गरेको थियो। भारतमा प्रतियुनिट बिजुली औसत ८ रुपैयाँ २५ पैसामा बिजुली बिक्री गरिएको थियो।

प्राधिकरणले दैनिक बोलकबोलमार्फत तय हुने ‘डे अहेड’ मार्केटमा बिजुली बिक्री गरेको थियो। पछिल्लो पटक कुल ४१९ मेगावाट बराबरको बिजुली बिक्रीका लागि अनुमति प्राप्त भएको थियो। प्राधिकरणले थप केही आयोजनाको बिजुली बिक्रीका लागि अनुमति मागेको भए पनि लामो समयसम्म निर्णय आएको थिएन।

नेपाल समय
नदीमा जलसतह घटेपछि आन्तरिक माग व्यवस्थापनका लागि प्राधिकरणले हाल भारतबाट ३ हजार मेगावाट घन्टा बराबरको बिजुली आयात गरेको प्रवक्ता भट्टराईले बताए। बिहान ३ देखि ११ बजेसम्मको माग व्यवस्थापनका लागि प्राधिकरणले बिजुली आयात गरिरहेको छ। सो समयमा माथिल्लो तामाकोशी र कालीगण्डकी ‘ए’ आयोजना बन्द गरिने गरिएको छ। प्राधिकरणका अनुसार हाल कुल माग १ हजार ५१२ मेगावाट बराबर छ।

चिसो बढेसँगै बिजुलीको मागमा पनि वृद्धि भइरहेको छ। कोठा न्यानो बनाउन बिजुलीको प्रयोगमा वृद्धि भएपछि मागमा वृद्धि भएको हो। कुल उत्पादित बिजुलीमध्ये प्राधिकरणका आयोजनाबाट ७ हजार ८७४ मेगावाट घन्टा, सहायक कम्पनीका आयोजनाबाट ४ हजार ४ ४३ मेगावाट घन्टा उत्पादन भएको छ।

त्यस्तै, निजी क्षेत्रका आयोजनाबाट १२ हजार ७४० मेगावाट घन्टा बिजुली उपलब्ध छ। विभिन्न स्थानमा भएको अवरोधका कारण २३३ मेगावाट घन्टा प्रणालीभन्दा बाहिर छ। मुलुकभित्रको कुल जडित क्षमता २ हजार २५० मेगावाट बराबर छ। चालू आवको अन्त्यसम्म प्रणालीमा थप ८०० मेगावाट बराबरको बिजुली थप हुनेछ।

प्राधिकरणको माग अनुसारको अनुमति नपाएपछि वर्षायाममा केही बिजुली खेर गएको थियो। चालू आवमा थप हुने बिजुलीको भारत निर्यातका लागि वा आन्तरिक खपतका लागि आवश्यक व्यवस्था गर्न नसकिए प्राधिकरणलाई ठूलो घाटा हुने अवस्था पनि उत्तिकै छ। तर हिउँद लागेपछि नदीमा जलसतह ओरालो लाग्दा अपेक्षित क्षमताअनुसारको बिजुली उत्पादन हुन सक्दैन।

यद्यपि चालू आवको तीन महिनामा मात्रै प्राधिकरणले आठ अर्ब ५० करोड बराबरको नाफा कमाएको छ। यस्तै, २० युनिटसम्म बिजुली खपत गर्ने ग्राहकलाई रु ३० मात्रै महसुल तिर्दा हुने व्यवस्था गरिएको छ। त्यसबाट पनि प्राधिकरणले उपभोक्तालाई वार्षिक २० अर्ब बराबरको राहत दिएको दाबी गरेको छ।

आन्तरिक रुपमा नै बिजुलीको खपत बढाउनका लागि पहल भए पनि पछिल्ला दिनमा औद्योगिक क्षेत्रमा बिजुलीको माग घटेको छ। बैंक तथा वित्तीय संस्थामा तरलता अभाव तथा उपभोक्ता मुद्रास्फीति बढेकाले उद्योग पूर्ण क्षमतामा सञ्चालन हुन सकेका छैनन्। यसको प्रभाव पनि बिजुलीको खपतमा परेको छ।–रासस