थप १३ जनामा कोरोना संक्रमण पुष्टि, ४४ संक्रमित कोरोनामुक्त

काठमाडौँ, चैत २६ । नेपालमा पछिल्लो २४ घण्टामा थप १३ जनामा कोरोना संक्रमण पुष्टि भएको छ।

स्वास्थय मन्त्रालयका अनुसार २ हजार ५ सय ३९ पीसीआर परीक्षणका क्रममा १२ जना र १ हजार ६ सय १६ एन्टीजेन परीक्षणका क्रममा १ जनामा कोरोना पुष्टि भएको हो।

कोरोनाका कारण शनिबार कसैको मृत्यु नभएको मन्त्रालयले जनाएको छ।

त्यस्तै, यस अवधिमा थप ४४ संक्रमित कोरोनामुक्त भएका छन् । हालसम्म नेपालमा ९ लाख ६५ हजार ९ सय ८० जना निको भइसकेका छन् ।

हाल नेपालमा ६ सय ३७ सक्रिय संक्रमित आइशोलेशनमा रहेका छन् । नेपालमा निको हुने दर ९८.७ प्रतिशत रहेको छ ।

हालसम्म नेपालमा कोरोना भाइरसको सङ्क्रमणबाट ११ हजार ९५१ जनाको मृत्यु भएको छ ।