वरिष्ठ साहित्यकार इन्द्रबहादुर राईको निधन, विहीबार अन्त्येष्टि गरिने
काठमाडौं । वरिष्ठ साहित्यकार इन्द्रबहादुर राईको ९० वर्षको उमेरमा निधन भएको छ ।
भारतको दार्जिलिङस्थित निवासमा मंगलबार साँझ हृदयाघातका कारण उनको निधन भएको हो ।
तेस्रो आयाम र लीला लेखनका प्रणेता इन्द्रबहादुर राईको जन्म सन् १९२७ को फ्रेब्रअरी ३ का दिन खरसाङको बालासन खोला नजिकै भएको थियो ।
राईले नेपाली भाषा तथा वाङ्मयमा लामो योगदान पुर्याएका छन् ।
केही वर्षयता राई स्वास्थ्यका विविध समस्या खेपिरहेका थिए । उपचारका लागि उनी गतवर्ष काठमाडौंमा समेत आएका थिए ।
लीला लेखनका सुरुवातकर्ता तथा आयामेली साहित्यका सर्जक राईको ‘विपना कतिपय’, ‘आज रमिता छ’, ‘कठपुतलीको मन’ लगायतका सिर्जना प्रकाशित छन् ।
नेपाली भाषालाई भारतको संविधानमा राष्ट्रभाषाका रुपमा पहिचान दिलाउने चार दशक लामो भाषिक आन्दोलनमा पनि उनको योगदान थियो ।
२०७२ सालमा राईलाई त्रिभुवन विश्वविद्यालयले मानार्थ विद्यावारिधीले समेत सम्मान गरेको थियो ।
राईको निधनले नेपाली साहित्यमा अपूरणीय क्षति पुगेको छ । राईको विहीबार दार्जिलिङमा अन्त्येष्टि गरिने बताइएको छ ।
प्रतिक्रिया दिनुहोस्