सूचना जारी गर्दै स्वास्थ्य मन्त्रालयले भन्यो – कोरोना संक्रमण घटे पनि जोखिम कायमै छ

काठमाडौं, असार १७ । कोरोनाको महामारीको अन्त्य अझै भएको छैन । संक्रमितमा केहि कमि आएपनि जोखिम भने कायमै रहेको स्वास्थ्य मन्त्रालयले जनाएको छ ।

पछिल्लो समय कोरोना परीक्षण नगर्नेको संख्या बढ्दै गएको स्वास्थ्य तथा जनसंख्या मन्त्रालयले जनाएको हो । मन्त्रालयले सूचना जारी गर्दै केही दिनयता संक्रमण घटे पनि जोखिम भने कायम नै रहेको जनाएको छ।

कोरोना लक्षण देखिए पनि घरमा बस्ने प्रवृत्ति बढेको र यसले अन्यलाई सार्ने जोखिम हुने भएकाले समयमा नै परीक्षण गर्न मन्त्रालयले अनुरोध गरेको छ।

पछिल्लो समय भिडभाड बढ्दै गएपछि संक्रमण फैलन सक्ने भन्दै मन्त्रालयले कोरोना महामारी नियन्त्रणका लागि मास्क लगाउने, भौतिक दूरी कायम गर्ने र समयमै परीक्षण गर्न अनुरोध गरेको हो।

मन्त्रालयले सम्पर्कमा आएका र लक्षण देखिएका जो–कोहीले पनि तुरून्तै पिसिआर परीक्षण गर्न अनुरोध गरेको छ। नेपालमा ‘डेल्टा प्लस भेरियन्ट’ फैलँदो क्रममा हुनाले तेस्रो लहर आउने संकेत गरेको विज्ञले बताउँदै आएका छन्।

कोरोनाका कारण सुनसान भएको काठमाडौं उपत्यकामा अहिले चहलपहल पनि बढेको छ । यातायात खुलेका छन् भने मान्छैको भिडभाड पनि त्यतिकै रहको छ । यसले पनि जोखि बढ्ने सम्भावना रहेको छ ।