माओवादी केन्द्र एक्लै निर्वाचन जित्नुपर्छ भन्ने पक्षमाः अध्यक्ष प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहालले एक्लै लडेर निर्वाचन जित्नुपर्छ भन्ने पक्षमा आफूहरु रहेको बताएका छन् ।

प्रेस सेन्टर चितवनले आयोजना गरेको पत्रकार सम्मेलनमा दाहालले चितवन क्षेत्र नं ३ मा माओवादी केन्द्र एक्लै निर्वाचन लडेर जित्ने लक्ष्यमा रहेको बताए । निर्वाचन जित्न सक्नुहुन्छ ? भन्ने प्रश्नमा दाहालले भने, “सम्भावना छ भन्ने विश्वासमा छु ।”
चुनावी तालमेलका विषयमा अन्य दलहरुसँगको छलफल पनि जारी रहेको उहाँले बताउदै उनले भने “तालमेलको छलफल सबै दलसँग चलेको छ, टुंगो भने लागेको छैन ।” नेपाली काँग्रेस र नेकपा एमालेसँग तालमेलका विषयमा छलफल चलिरहेको भन्दै उहाँले ठोस निष्कर्षमा अहिले नपुगिसकेको बताए ।”

बाँदरमुढे घटनाका कारण अहिले पनि आलोचित रहेका प्रचण्ड असोज तेस्रो साता माडी जाने बताए । बाँदरमुढे घटनापछि माडीको विकासका लागि प्याकेजसहित आउने यसअघि घोषणा गरे पनि पीडितले प्याकेज भने पाउन सकेका छैनन् ।
निर्वाचनमा उठ्ने भएपछि विभिन्न कार्यक्रममा दाहाल सहभागी हुने क्रम बढ्दो छ ।