रियल म्याड्रिड बेल बेच्न तयार

म्याड्रिड (एजेन्सी) ।  विभिन्न  श्रोतहरुका अनुसार रियल म्याड्रिडले आफ्ना स्टार खेलाडि ग्यारेथ बेललाई यस समर ट्रान्सफर विन्डोमा बेच्न तयार भएको जनाएको छ । सन् २०१३ मा रियल पुगेका बेल चोटका कारण यस सिजन नियमित खेल्न पाएका छैनन् ।

टोटनह्यामबाट रियल म्याड्रिड आएयता बेलले आफ्नो प्रतिभाको झल्को देखाए पनि चोटका कारण नियमित खेल्न नपाउदा रियल उनलाई बेच्ने निर्णयमा आएको स्रोतले बताइएको छ ।

यस सिजन रियल म्याड्रिडले घरेलु लिगमा आशा गरेजस्तो प्रदर्शन गर्न सकेको छैन । त्यसैले यस सिजन पश्चात रियलले केहि ठूला नाम क्लबमा भित्राउने पक्का छ । रियल पिएसजीका नेयमार, चेल्सीका एडेन हाजार्ड र टोटनह्यामकै ह्यारी केनलाई भित्राउने होडमा रहेको बताइएको छ ।

आफूले चाहेको खेलाडिहरु किन्न रियलले केहि खेलाडिहरुलाई विदा गर्नु पर्दा बेलको पनि रियलमा समय समाप्त हुने बुझ्न सकिन्छ । अघिल्लो साता पिएसजीविरुद्धको च्याम्पियन्स लिग खेलमा पनि उनी बेन्चमै थिए भने प्रशिक्षक जिनेदिन जिदान उनीबाट खासै प्रभावित नरहेको खबर आएको छ ।

रियलमा मार्को एसेन्सियो उदाउंदै गर्दा बेलले उनलाई टोलीमा स्थानका लागि  उछिन्न पनि मुश्किल देखिएको छ । हाल म्यानचेस्टर युनाइटेड र चेल्सी बेललाई आफ्नो टोलीको हिस्सा बनाउन इच्छुक रहेका छन् ।