फर्निचर उद्योगमा भिषण आगलागी, ५१ लाखको क्षति

काठमाडौं, चैत ३१ । खोटाङको दिक्तेल रुपाकोट मझुवागढी नगरपालिकाको एक फर्निचर उद्योगमा आगलागी हुँदा झण्डै ५१ लाखको क्षति भएको छ ।

दिक्तलको रत्नपार्कमा सञ्चालित गणेश फर्निचर उद्योगमा मंगलबार बिहान भएको आगलागीमा रु ५० लाख ८६ हजार बराबरको क्षति भएको प्रहरीले जनाएको छ । विद्युत चुहावटका कारण आगलागी भएको हुनसक्ने प्रहरीको अनुमान छ ।

बिहान करीब ४ः३० बजेबाट सुरु भएको आगोले उद्योगमा रहेको मेसेनरी सामान, तयारी फर्निचर, काठपातलगायत सबै जलेर नष्ट जिल्ला प्रहरी कार्यालय खोटाङका प्रमुख प्रहरी नायब उपरीक्षक नारायणप्रसाद चिमोरियाले जानकारी दिए ।

स्थानीय हर्कराज राईको उद्योगमा लागेको आगो नेपाली सेना, जनपथ तथा सशस्त्र प्रहरी, नगरपालिकाको वारुणयन्त्र र स्थानीय वासिन्दाको सहयोगमा दुई घण्टापछि नियन्त्रण्मा आएको थियो ।

आगो समयमा नियन्त्रणमा लिइएकाले आसपासका घरहरूमा भने क्षति हुन पाएन । खोटाङमा चैत महिनामा मात्रै दुई दर्जन बढी घर तथा गोठमा आगलागी भएको छ । पछिल्लो समय देशका विभन्न ठाउँमा आगलागी भइरहेका बेला अन्य क्षेत्रमा पनि आगो लागी रहेको छ ।