अज्ञात समूहद्वारा ट्रक चालकमाथि खुकुरी प्रहार, खुट्टा र हातका पञ्जाका भागहरु काटिए

काठमाडौं, फागुन २६ । अज्ञात समुहले एकजना ट्रक चालकमाथि खुकुरी प्रहार गरेका छन् । दैलेखबाट भैंसी लोड गरेर बाँकेको नेपालगञ्ज जाँदै गरेको ट्रकका चालकलाई अज्ञात समूहले खुकुरी प्रहार गरेर गम्भीर घाइते बनाएको छ।

मंगलबार राति साढे एक बजेतिर भेरीगंगा नगरपालिका–१२ स्थित मसिनाको जंगलमा ट्रक रोकेर चार जनाको समूहले चालक २३ वर्षीय पवन शाहीलाई खुकुरी प्रहार गरेका हुन् । आक्रमणबाट चालक शाहीका दुबै खुट्टा र हातका पञ्जाका भागहरु काटिएको जिल्ला प्रहरी कार्यालय सुर्खेतले जनाएको छ ।

जिल्ला प्रहरी कार्यालय सुर्खेतका डिएसपी रामबहादुर घर्तीमगरले भने, ‘घटनाको प्रकृति हेर्दा दुबै खुट्टा र हात काट्ने उद्देश्य देखिन्छ,’ ‘चालकले प्रतिकार गरेका कारण ठूलो घटना हुन पाएन।’

आक्रमण गर्नेहरुको खोजी भइरहेको र पुरानो रिसिइवीका कारण आक्रमण भएको हुन सक्ने प्रहरीले अनुमान गरेको छ।