प्रतिनिधिसभाका सांसद: रोकिएका सबै सुविधासहित तलब भत्ता एकमुष्ट पाउने

काठमाडौं, फागुन १३ । प्रतिनिधिसभाका सांसदले रोकिएका सबै सुविधासहित तलब भत्ता एकमुष्ट पाउने भएका छन् । प्रतिनिधिसभाका सांसदहरुले विघटित अवधि (पुस ५ देखि फागुन ११) सम्मको सबै तलब भत्तासहित सुविधा पाउने भएका हुन् ।

प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गत पुस ५ गते प्रतिनिधिसभा विघटन गरिदिएपछि सांसदहरुको तलब भत्ता सहितका सबै सुविधा रोकिएका थिए ।

सर्वोच्च अदालतले प्रतिनिधिसभा विघटन बदर गर्दै पुस ५ र फागुन ११ बीचको समयलाई ’शून्य समय’ का रुपमा परिभाषित गरिदिएपछि उक्त अवधिको पनि सबै सुविधा सांसदहरुले पाउने भएका हुन् ।
पुस ५ देखि फागु ११ सम्मको शून्य समयको पनि कानुन अनुसार प्रतिनिधिसभाका सबै २७५ जना सांसदहरुले पाउने संसद सचिवालयका सह प्रवक्ता दशरथ धमलाले बताए ।

उनका अनुसार प्रतिनिधिसभाका सबै सांसदहरुले पुस र माघको तलब भत्ता फागुनसँगै एकसाथ पाउने छन् ।सरकारले एकजना सांसदका लागि तलब भत्तासहित करिब ६५ हजार रुपैयाँ निर्धारण गरिदिएको छ ।

प्रतिनिधिसभाका २ सय ७५ सांसदहरुले मासिक १ करोड ८० लाख रुपैयाँ तलबभत्ता वापत लिने गरेका छन् ।संघीय संसद सचिवालयले प्रतिनिधिसभाका २७५ सांसदको पुस र माघको ३ करोड ७५ रुपैयाँ भुक्तानी तयारी गरेको छ ।

यसका लागि संसद सचिवालयले फागुनको तलबमा पुस र माघको पनि जोडेर निकासा तयारी गर्न लागेको हो ।