फेरि बढ्यो चिसो, काठमाडौंको तापक्रम ३.५ डिग्री
काठमाडौं , माघ ९ । काठमाडौंको आजको न्यूनतम तापक्रम ३.५ डिग्री सेल्सियस रहेको छ । विहान साढे ६ बजेको तापक्रम ३।५ डिग्री सेल्सियस मापन गरिएको मौसम पूर्वानुमान महाशाखाले जनाएको छ ।
आज काठमाडौंमा दिउँसोको तापक्रम १८–२० डिग्री सेल्सियसको बीचमा हुने अनुमान गरिएको छ । काठमाडौंको मौसम आज सफा नै रहने बताइएको छ ।
केही दिन अझै तापक्रम घट्दै जाने महाशाखाको भनाइ छ । अहिले (विहान) देशका पहाडी भू–भागमा आंशिक बदली रहेको छ ।
दिउँसो देशका पहाडी भू–भागमा आंशिक बदली रही बाँकी भू–भागमा मौसम सामान्यतया सफा रहनेछ । तराईका केही स्थानमा बिहान हुस्सु र कुहिरोसमेत लागे पनि दिउँसो क्रमशः हट्दै जाने जल तथा मौसम विज्ञान विभागले जनाएको छ ।
आज राति सुदूरपश्चिम र कर्णाली प्रदेशमा आंशिकदेखि सामान्य वदली तथा प्रदेश १, वाग्मती, गण्डकी र लुम्विनी प्रदेशका पहाडी भू–भागमा आंशिक बदली रही बाँकी भू–भागमा मौसम सामान्यतया सफा रहनेछ ।
विभागले तापक्रममा कमी आउँदा चिसो बढ्नेभन्दै यसबाट बच्न सतर्क हुन आग्रह गरेको छ ।
प्रतिक्रिया दिनुहोस्