एमिकस क्युरीमा पहिलोपटक महिला सिफारिश

काठमाडौं, पुस २१ । पहिलोपटक एमिकस क्युरीमा महिलालाई सिफारिश गरिएको छ । सर्वोच्च अदालत बार एसोसिएसनले प्रतिनिधि सभा विघटनविरूद्धको मुद्दामा सुनुवाइका लागि अदालतको आदेशानुसार समावेशी बनाउने उद्देश्यले अदालतका सहयोगी(एमिकस क्युरी) मा वरिष्ठ अधिवक्ता गीता पाठकको नाम सिफारिश गरेको हो ।

सर्वोच्च अदालत बारको सोमबार बसेको कार्यसमितिको बैठकले वरिष्ठ अधिवक्ता पाठकको नाम सिफारिश गरेको बारका उपाध्यक्ष राजु खड्काले बताए ।

सर्वोच्च बारले यसअघि शुक्रबार बैठक बसेर बारका बहालवाला अध्यक्ष वरिष्ठ अधिवक्ता खगेन्द्रप्रसाद अधिकारी र हालै निर्वाचित अध्यक्ष वरिष्ठ अधिवक्ता पूर्णमान शाक्यको नाम सिफारिश गरेको थियो।

बारका अध्यक्ष अधिकारी कोरोना संक्रमण भई आइसोलेसनमा रहेकाले पाठकको नाम सिफारिश गरिएको बताएको छ ।बारले अदालतका सहयोगीमा अर्को व्यक्ति पठाउँदा समावेशी पनि हुने भएकाले वरिष्ठ अधिवक्ता पाठकको नाम सिफारिश गरेको उपाध्यक्ष खड्काले बताए ।

सर्वोच्च अदालतले प्रतिनिधि सभा विघटन विरूद्धको मुद्दामा सर्वोच्च अदालत बारबाट दुई वरिष्ठ अधिवक्ता वा अधिवक्ता एमिकस क्युरीका लागि झिकाउने आदेश जारी गरेको थियो।

नेपाल बार एसोसिएसनले भने एमिकस क्युरीमा वरिष्ठ अधिवक्ता बद्रीबहादुर कार्की, सतिशकृष्ण खरेल र विजयकान्त मैनालीको नाम बिहीबार सिफारिश गरिसकेको छ।

अदालतको आदेशानुसार यही पुस १९ गते राष्ट्रपति र प्रधानमन्त्री तथा मन्त्रिपरिषद्को कार्यालय एवं प्रतिनिधि सभाका सभामुखबाट लिखित जवाफ अदालतमा दर्ता भइसकेको छ।

यही पुस २२ गतेदेखि सर्वोच्च अदालतमा उक्त विवादमा सुनुवाइ सुरू हुने तय भएको छ। अब सबैको ध्यान यतैतिर केन्द्रित भएको छ ।