२७ वर्षीया महिलाको हत्या, श्रीमान पक्राउ

काठमाडौं, पुस २१ । इलाममा एक महिलाको हत्या भएको छ । देउमाई नगरपालिका–८ आमबोटेकी २७ वर्षीया नम्रता राईको हत्या भएको हो ।

सामान्य घरायसी विवादका विषयलाई लिएर श्रीमानले श्रीमतीलाई खुकुरी प्रहार गरी हत्या गरेका हुन् । प्रहरीले भने हत्या गरेको अभियोग पति ३३ वर्षीय सुवास राईलाई लगाएको छ ।

घटनाबारे जानकारी पाउनासाथ प्रहरीचौकी जीतपुरबाट खटिएको प्रहरी टोलीले अभियुक्त राईलाई नियन्त्रणमा लिएको छ ।

उक्त स्थानमा जिल्ला प्रहरी कार्यालयबाट अनुसन्धान अधिकृतसहितको टोलीले अनुसन्धान गरिरहेको र शव परीक्षण गर्ने तयारी भइरहेको प्रहरीले जनाएको छ ।