पाकिस्तानी सेनाको हेलिकप्टर दुर्घटना, ४ जनाको मृत्यु

काठमाडौं, पुस १२ । पाकिस्तानी सेनाको हेलिकप्टर दुर्घटना हुँदा ४ जनाको मृत्यु भएको छ । उत्तरी गिल्गिट बाल्टिस्तान क्षेत्रमा शनिबार दुर्घटनाग्रस्त भएको हो ।

उक्त दुर्घटनामा दुई पाइलट र दुई सैनिक सहित चार जनाको मृत्यु भएको सेनाले जारी गरेको विज्ञप्तिमा जनाएको छ । सेनाले उक्त हेलिकप्टर प्राविधिक गडबडीका कारण दुर्घटनाग्रस्त भएको प्रतिक्रिया दिएको छ ।

बाल्टिस्तान क्षेत्रमा गोली लागेर घाइते भएका एक सिपाहीको उद्धारका लागि खटिएको हेलिकप्टर दुर्घटनाग्रस्तमा परेको हो ।

निर्जन पहाडी इलाकामा हेलिकप्टर दुर्घटनाग्रस्त भएको थियो भने हेलिकप्टर पूर्ण रुपमा नष्ट भएको बताइएको छ ।