भारत आग्रामा सडक दुर्घटनाः तीन जना नेपालीको मृत्यु

काठमाडौं , कार्तिक २७ । भारतको आगरा एक्सप्रेस वेमा सडक दुर्घटना हुँदा तीन जना नेपालीको मृत्यु भएको छ ।नयाँदिल्लीबाट भैरहवाको सीमावर्ती सुनौलीतर्फ आइरहेको सात नेपाली यात्रु बोकेको कार मंगलबार राति साढे बाह्र बजेतिर आगरा एक्सप्रेस वेमा एउटा ट्रकसँग ठोक्किँदा उक्त दुर्घटना भएको हो ।

दुर्घटनामा दुई जनाको घटनास्थलमै र अर्को एक जनाको आगराको कृष्ण अस्पतालमा उपचारका क्रममा मृत्यु भएको छ ।मृत्यु हुनेमध्ये एक महिलाको नाम लक्ष्मीकुमारी भएको र अन्य दुई जनाको नाम खुलेको छैन ।

दुर्घटनामा घाइते चार जनामध्ये अर्घाखाँची घर भएका दुई जनालाई दिल्ली पु¥याइएको र अन्य दुईको कृष्ण अस्पतालमै उपचार भइरहेको र अवस्था सुधारोन्मुख रहेको त्यहाँको प्रहरीले जानकारी दिएको छ ।
दुर्घटनामा चालक भने सामान्य घाइते भएका छन ।