चार लाख घूससहित प्रहरी हवल्दार दम्पत्ति अख्तियारको फन्दामा

काठमाडौं, असोज ३० । चार लाख घूससहित प्रहरी हवल्दार दम्पत्ति अख्तियारको फन्दामा परेका छन् । घूस रकमसहित अख्तियार दुरुपयोग अनुसन्धान आयोग बुटवल कार्यालयले नेपाल प्रहरीका हवल्दार शिवचन्द्र सहानीलाई घूस रकमसहित रंगेहात पक्राउ गरेको हो ।

उनी रुपन्देहीको इलाका प्रहरी कार्यालय बुटवलमा कार्यरत प्रहरी हवल्दार हुन्। अख्तियारले सहानीकी श्रीमती निर्मला केवटलाई पनि पक्राउ गरेको छ।

शुक्रबार सियारी गाउँपालिका वडा नं। ७ स्थित खनाल मिठाई पसल नजिकबाट सहानी दम्पत्तिलाई ४ लाख रुपैयाँ घूस रकमसहित पक्राउ गरिएको अख्तियार प्रवक्ता सुरेश भुसालले जानकारी दिए।

हवल्दार सहानीले एक सेवाग्राहीलाई धरौटीमा छुटाइदिन सहयोग गरेवापत घूस रकम लिएका थिए। उनीहरुले घूस लिइसकेको अवस्थामा रंगेहात पक्राउ गरेर थप अनुसन्धान भइरहेको प्रवक्ता भुसालले बताए ।