वामदेव गौतमले लिए राष्ट्रियसभा सदस्यको शपथ , भने-अब आफ्नो कामकारवाही राष्ट्रिय सभामा केन्द्रीत हुनेछ

काठमाडौं , असोज १ । नेपाल कम्युनिष्ट पार्टी (नेकपा)उपाध्यक्ष वामदेव गौतमले राष्ट्रियसभा सदस्यको पद तथा गोपनियताको सपथ लिएका छन् । राष्ट्रिय सभा अध्यक्षका गणेश तिमल्सिनाले गौतमलाई बिहीबार सिंहदरवारमा सपथ गराएका हुन् ।

गौतमले जनताका नाममा सपथ लिएका हुन् । राष्ट्रपति भण्डारीले गौतमलाई राष्ट्रियसभा सदस्य पदमा मनोनित गरेलगत्तै गौतमले सपथ लिएका हुन् ।

राष्ट्रपति भण्डारीले गौतमलाई संविधानको धारा ८६ को उपधारा २ को खण्ड ख बमोजिम गौतमलाई मनोनित गरेकी हुन् ।गत सोमबार बसेको मन्त्रिपरिषद बैठकले गौतमलाई राष्ट्रिय सभा सदस्यमा मनोनित गर्न सिफारिस गरेको थियो ।

सपथ समारोहमा संक्षिप्त सम्बोधन गर्दै गौतमले अव आफ्नो कामकारवाही राष्ट्रिय सभामा केन्द्रीत हुने बताए । यस्तै उनले राष्ट्रियसभाको प्रतिष्ठा र गरिमा नगिराउने गरी काम गर्ने प्रतिवद्धता पनि जनाए । कार्यक्रममा नेकपा अध्यक्ष पुष्पकमल दाहाल प्रचण्ड, वरिष्ठ नेता झलनाथ खनाल, सुवास नेम्वाङ लगायतका नेता तथा सांसदहरु सहभागी भएका थिए ।

प्रतिनिधि सभाको निर्वाचनमा प्रत्यक्षतर्फ पराजित भएका गौतम पार्टीभित्रको लामो राजनीतिक रस्साकस्सीपछि राष्ट्रिय सभामा पुगेका हुन्।सत्तारुढ नेकपाका उपाध्यक्ष गौतमलाई केपी शर्मा ओली नेतृत्वको मन्त्रिपरिषद्‌ले राष्ट्रिय सभा सदस्यका लागि सिफारिस गरेको थियो।