वाह्रविसेका वाढि पहिरो पीडित परिवारलाई राहत सामाग्री वितरण

काठमाडौं, ३० असार । शुभेच्छुक हातहरु नामक संस्थाले सिन्धुपाल्चोक वाह्रविसे स्थित जम्मु क्षेत्रका वाढि पहिरो पीडित परिवारलाई राहत सामाग्री वितरण गरेको छ ।
गत असार २४ गते सिन्धुपाल्चोक जिल्लाको वाह्रविसे स्थित जम्मु क्षेत्रमा आएको वाढि तथा पहिरोका पीडितहरुलाई शुभेच्छुक हातहरु नामक संस्थाले पीडित परिवारलाई राहत प्रदान गरेको हो ।

आज सिन्धुपाल्चोक जिल्लाको वाह्रविसेमा आयोजित राहत वितरण कार्यक्रममा पिढित ३२ परिवारलाई दाल, चामल, तेल, चिउरा लगायत करिव ६० हजार रुपैया वरावरको खाध्य सामाग्री वितरण गरिएको संस्थाद्वारा जारी विज्ञप्तिमा जनाएको छ ।

संस्थाका सल्लाहकारहरु अमेरिकाको क्यालिफोर्निया निवासी केशव राज भट्टराई र शिशिर पोखरेलको आर्थिक सहयोगमा उक्त सामाग्री खरिद गरि हस्तान्तरण गरिएको हो । भक्तपुरको सुर्यविनायकमा रहेको सुभेच्छुक हातहरु नामक संस्थाले आगामी दिनमा पनि यस किसिमको सहयोगलाई निरन्तरता दिने संस्थाका अध्यक्ष खडानन्द घोरासैनीले प्रतिवद्धता जनाए ।