जर्मन बुन्डेसलिगा : बायर्नको फराकिलो जित

काठमाडौं, जेठ २५ । जर्मन बुन्डेसलिगा फुटबलमा बायर्न म्युनिखले लेवरकुसनमाथि फराकिलो जित निकालेको छ । शीर्ष स्थानको बायर्नलने शनिबार राति भएको खेलमा लेवरकुसनमाथि ४–२ को फराकिलो जित निकालेको हो ।

बायर्नको जितका लागि किङ्सले कोम्यान, लियोन गोर्टेज्का, सेर्गी गनाब्री र रोबर्टो लेवान्डोस्कीले एक–एक गोल गर्दा लेवरकुसनका लागि लुकास अलारियो र फ्लोरियन विट्जले एक–एक गोल गरेका थिए ।

खेलको १०औं मिनेटमा लुकासको गोलबाट लेवरकुसनले अग्रता बनाएको थियो । तर, २७औं मिनेटमा बायर्नका कोम्यानले गोल गर्दै खेललाई १–१ को बराबरीमा ल्याए । पहिलो हाफ सकिन तीन मिनेट बाँकी हुँदा गोर्टेज्का र अन्तिम मिनेटमा सेर्गीले गोल गर्दै पहिलो हाफमा बायर्न ३–१ ले अघि बढ्यो ।

खेलको ६६औं मिनेटमा लेवान्डोस्कीले गोल गर्दा बायर्न ४–१ स्थितिमा रह्यो । खेलको ८९औं मिनेटमा लेवरकुसनका फ्लोरियनले एक गोल गर्दै खेलमा फर्किने प्रयास गरेका थिए । तर, थप गोल गर्न नसके पनि लेवरकुसनल बायर्नसँग ४–२ ले पराजित भयो ।

जितसँगै बायर्नले उपाधि जित्ने सम्भावना बलियो बनाएको छ । उपाधिका लागि अब बर्यनले २ खेल जिते पुग्नेछ ।